На разгляд у суд накіравалі крымінальную справу ў дачыненні да 67-гадовага мужчыны, якога абвінавачваюць у жорсткім абыходжанні з жывёлай, паведамляе агенцтва «Мінск-Навіны».
Некалькі гадоў таму абвінавачаны набыў пнеўматычную вінтоўку. У адзін з чэрвеньскіх дзён 2025 года мужчына знаходзіўся дома, у кватэры на вуліцы Галадзеда. Яму стала сумна, і ён успомніў часы, калі хадзіў на паляванне. Тады пенсіянер дастаў вінтоўку, выйшаў на балкон і ўбачыў бяздомнага ката, у якога і стрэліў.
Параненую жывёліну знайшла неабыякавая мясцовая жыхарка і перадала валанцёрам. Тыя аднеслі ката ў ветэрынарную клініку, дзе з яго спіннога мозгу дасталі кулю. На жаль, з-за атрыманага пашкоджання ён ужо не зможа самастойна перасоўвацца.
Праз два тыдні ў кватэру пенсіянера пастукалі міліцыянеры. Ён прызнаўся ім у зробленым. У дачыненні да мужчыны ўзбудзілі крымінальную справу. Пры гэтым адзначаецца, што ў момант здзяйснення злачынства ён быў цалкам цвярозы.
«Абвінавачаны раней да крымінальнай адказнасці не прыцягваўся, — пракаментавала намесніца пракурора Заводскага раёна Вікторыя Кунцэвіч. — Яму выстаўлена абвінавачанне ў жорсткім абыходжанні з жывёлай, якое пацягнула яе калецтва, учыненае з хуліганскіх і іншых нізкіх матываў, гэта значыць у злачынстве, прадугледжаным ч. 1 арт. 339-1 КК, санкцыя якога — арышт або абмежаванне свабоды на тэрмін да двух гадоў».
Цяпер чытаюць
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў1010
Каментары