У Магілёве прадаюць бельведэр на даху сталінкі: 15 квадратаў і 24 акны з усіх бакоў
У Магілёве выстаўлены на продаж сапраўды ўнікальны аб’ект — вежа-бельведэр на даху жылога дома 1954 года пабудовы, які ёсць адным з нешматлікіх у горадзе прыкладаў пасляваеннай савецкай неакласікі.
Дом размешчаны па адрасе вуліца Першамайская, 46, на скрыжаванні з Ціміразеўскай — насупраць Мінскага рынку і сабора Трох Свяціцеляў. У будынку жыў вядомы акцёр і рэжысёр Валянцін Ермаловіч, пра што сведчыць памятная дошка на фасадзе.
Бельведэрам называецца надбудова ў выглядзе вежы з вялікімі аконнымі праёмамі, праз якія можна аглядаць наваколле. Яны часта ўпрыгожваюць сталінкі ў месцах, дзе архітэктары імкнуліся стварыць кампазіцыйную дамінанту. Напрыклад, вядомы бельведэр будынка КДБ у Мінску — так званая вежа Цанавы — замыкае перспектыву бульвара па Камсамольскай вуліцы.
Аб’ект прапануе набыць кампанія Savmet, якая бачыць у гэтым памяшканні патэнцыял для самых розных ідэй — ад панарамнага лаўнжа або віннага бара з відамі на Магілёў да стыльнай майстэрні, шоўрума або гасцявога дома прэміум-класа. Памяшканні ўжо спрабавалі прадаць у 2017 годзе, але беспаспяхова.
Агульная плошча кватэры з бельведэрам складае 47 м², аднак яна падзелена паміж трыма ўзроўнямі. Уваход знаходзіцца з пятага паверху, дзе няма вокнаў, а значную частку плошчы займае лесвіца. На сярэднім, шостым паверсе, ёсць два невялікія акны пад самай столлю — на вышыні амаль 4 метраў, але і там шмат месца з’ядае лесвіца, якая вядзе з ніжняга ўзроўню.
Каб падняцца ва ўласна бельведэр — на верхні ярус — трэба скарыстацца крутой металічнай лесвіцай і пралезці праз люк у столі. Магчыма, усе гэтыя пераходы можна было б замяніць адной кампактнай вінтавой лесвіцай.
Плошча верхняга памяшкання сціплая — усяго 15 м², але вышыня столі дасягае 5,6 метра. Асаблівасцю бельведэра з’яўляецца тое, што на кожнай з васьмі сцен размешчаны па тры акны — дзякуючы гэтаму з вяршыні адкрываецца панарамны від на цэнтр Магілёва.
Кампанія таксама прапаноўвае магчымасць пашырэння да 200 м² на другім узроўні. Паводле чарцяжоў, гэта пашырэнне на шостым паверсе прапануецца зрабіць за кошт паддашкавай прасторы.
Аднак каб ажыццявіць такі праект, прыйдзецца ахвяраваць гістарычным выглядам дома — знішчыць балюстраду і ўзвесці сцены над цяперашнім карнізам прыкладна на два метры.
Аб’ект ацэнены ў 52 тысячы даляраў. У камплекце з продажам прапануюцца планіроўка і прыклады магчымых дызайнерскіх рашэнняў — відавочна, згенераваных нейрасеткай.
«Наша Нiва» — бастыён беларушчыны
ПАДТРЫМАЦЬБеларускі бізнэсмен аднаўляе гістарычны палац Любамірскіх у Беластоку. Там будзе гатэль і рэстаран
Уладальнік «Маёнтка Падароск» лічыць незаконным аўкцыён па продажы сядзібы. Ён накіраваў прэтэнзію ў райвыканкам
Сядзіба Яленскіх у Клецкім раёне, якую прадавалі двойчы, зноў шукае гаспадара
У былым кляштары бернардынаў у Дуброўне будзе стаматалогія, арыентаваная на замежнікаў
Цяпер чытаюць
Фізік з Акадэміі навук пераехаў на працу ў Польшчу. Падчас візіту ў Беларусь яго арыштавалі за палітыку і кінулі ў калонію14
Каментары
Зараз такое не купіш. Немэтазгодна.