Беларуская дэмакратычная лідарка Святлана Ціханоўская дала інтэрв'ю Deutsche Welle, у якім сярод іншага адказала на пытанні, чаму прыярытэтнай ёсць адназначная падтрымка Украіны і як ад гэтага залежыць будучыня Беларусі.
— Мы павінны дакладна разумець, што дапамога Украіне — гэта прыярытэт, таму што перамога Украіны будзе мець важнае значэнне для многіх краін, у першую чаргу, Беларусі. […]
Пакуль там Лукашэнка, пакуль ён служыць інтарэсам Пуціна, гэта будзе пастаянная крыніца пагроз і для Украіны, і для ўсяго Еўрасаюза. […]
Для нас важна, каб мір быў на ўмовах Украіны, Справядлівы мір, каб у Беларусі не было гэтай навіслай пагрозы ад Расіі, якая жадае зрабіць губерню з Беларусі.
— Калі трошкі памарыць, якім вы бачыце ідэальны сцэнарый для вашай краіны, скажам, у найбліжэйшыя пяць гадоў?
— Ідэальны сцэнарый — гэта Украіна атрымлівае ўсю неабходную дапамогу, каб у гэтай вайне здабыць справядлівы мір. У гэты момант Расія канцэнтруецца на сваіх праблемах і не аказвае ні палітычную, ні эканамічную падтрымку Лукашэнку. Мы паралельна працуем над расколам эліт, прапануючы нацыянальны дыялог наменклатуры. Адбываецца працэсы дэмакратызацыі, працэс дыялогу паміж грамадствам і рэжымам. Я не гавару пра Лукашэнку, Лукашэнка — гэта страчаны кейс, мы яго ўжо не ўлічваем. І мы разам, усёй нацыяй працуем над дэмакратызацыяй. Таму што гэта працэс не аднамомантны, і ў гэты момант нацыі трэба будзе згуртавацца, таму што пасля перамен жыццё таксама не будзе цудоўным. […]
— Што дае вам надзею, што гэты сцэнар рэалізуецца?
— Так як пачатковым пунктам ёсць падтрымка Украіны і перамога Украіны, я проста бачу, наколькі прынцыповая і рашучая палітыка ў нашых еўрапейскіх партнёраў. Цяпер усе абмяркоўваюць гэты план, прапанаваны Амерыкай, і альтэрнатыўны план, прапанаваны Украінай сумесна з Еўропай.
Гэта ўсё радыкальна адрозніваецца, і было б выдатна, калі б гэты працэс міру ва Украіне быў запушчаны на ўмовах Украіны. Мы не можам дазволіць Украіне палітычна прайграць у гэтай вайне,
таму што гэта адкрые скрыню Пандоры, і ў такім выпадку ўся Еўропа будзе жыць у пастаянным напружанні, як мінімум. Гэта адпраўны пункт.
Проста я бачу рашучасць украінцаў, гэта настолькі годны народ, які прыкладам служыць усім нам — столькі гадоў выстаяць з мінімальнай альбо недастатковай падтрымкай ад дэмакратычных краін».
Каментары