Падатковая інспекцыя Маскоўскага раёна паспрабавала апісаць маёмасць БХК
Падатковая інспекцыя Маскоўскага раёна 24 мая паспрабавала апісаць маёмасць рэспубліканскага праваабарончага грамадскага аб’яднання «Беларускі Хельсінскі камітэт». Пра гэта БелаПАН паведаміў кіраўнік юрыдычнай камісіі БХК Гары Паганяйла.
Канфлікт паміж падатковай інспекцыяй і праваабарончай арганізацыяй цягнецца ўжо больш як пяць гадоў. Падатковая інспекцыя вылучыла прэтэнзіі да БХК за няплату падаткаў на сродкі, атрыманыя ў якасці гуманітарнай дапамогі па праграме ТАСІС. Летам 2004 года гаспадарчы суд Мінска зняў з БХК абвінавачанні ва ўхіленні ад платы падаткаў па сродках, задзейнічаных у межах праграмы ТАСІС, аднак гэтае рашэнне апратэставаў намеснік старшыні Вышэйшага гаспадарчага суда Яўген Смірноў. У снежні 2004 года прэзідыум Вярхоўнага суда задаволіў яго пратэст і абавязаў БХК выплаціць падаткі і штрафныя санкцыі ў суме, эквівалентнай прыкладна 75.000 долараў ЗША. 1 лістапада 2006 года гаспадарчы суд Мінска пастанавіў канфіскаваць частку маёмасці БХК на 255 тысяч рублёў у лік выплаты 160 млн. рублёў штрафу і падатковых запазычанасцяў.
Між тым, на думку БХК, гэтыя грошы не абкладаюцца падаткам.
«Нам час ад часу нагадваюць аб нявыплачанай суме. Мы рэгулярна ходзім і ў пракуратуру, і ў падатковую інспекцыю, дзе сцвярджаем, што грошы, атрыманыя ў межах праграмы ТАСІС, не абкладаліся падаткам. У той час калі мы атрымлівалі грошы па гэтай праграме, Савет міністраў не прывёў беларускае заканадаўства ў адпаведнасць з указам прэзідэнта, згодна з якім гуманітарная дапамога, якая атрымліваецца ў межах праграмы ТАСІС, павінна абкладацца падаткам. Таму вінаватымі ў няўплаце падаткаў мы сябе не лічым», — сказаў Паганяйла.
Паводле яго слоў, усе рахункі арганізацыі заблакіраваныя, арганізацыя ж не мае ніякай уласнасці — усё абсталяванне і маёмасць яна арандуе. Таму, як заявіў Паганяйла, у адпаведнасці з законам апісаць у БХК няма чаго.
Каментары