Пра гэта Лукашэнка заявіў на сустрэчы з мэрам расійскай сталіцы.
Беларусь чакае «масквічоў з вялікімі інвестыцыямі», заявіў Аляксандр Лукашэнка 20 сакавіка ў Маскве на сустрэчы з мэрам расійскай сталіцы Сяргеем Сабяніным.
Нагадаем, Лукашэнка прыбыў у Маскву ў мінулую нядзелю для ўдзелу ў пасяджэнні Міждзяржаўнага савета ЕўрАзЭС 19 сакавіка. Сёння рабочы візіт у Расію працягваецца, паведамляе сайт беларускага кіраўніка.
«Мы чакаем масквічоў з вялікімі інвестыцыямі.
У нас адкрыта краіна для масквічоў, мы з задавальненнем будзем рабіць усё для пашырэння гэтага супрацоўніцтва»,— цытуе Лукашэнку РІА Новости.
Паводле слоў кіраўніка дзяржавы, Масква і Беларусь створаць сумесную групу для вырашэння пытанняў супрацоўніцтва — «як прыватнага характару, так і больш шырокія пытанні». З мэрам Масквы яму ўдалося дамовіцца аб перспектывах супрацоўніцтва ў цэлым, дадаў Лукашэнка.
Ён падзякаваў Сабяніну за тое, што той мысліць стратэгічна і не «разбурае напрацоўкі». «Для мяне галоўнае было пачуць, што Беларусь не чужая для Масквы. Мы, як і раней, будзем супрацоўнічаць з вамі і знаходзіць яшчэ большыя ступені ў развіцці гэтага супрацоўніцтва», — сказаў Лукашэнка. Ён адзначыў, што вобласці Беларусі будуць супрацоўнічаць з прэфектурамі і ўправамі Масквы.
Сабянін са свайго боку паведаміў аб намеры Беларусі і сталіцы Расіі падпісаць дагавор аб супрацоўніцтве на 2013–2016 гады. «Мы пракансультаваліся з беларускімі калегамі і мяркуем у найбліжэйшы час заключыць новы план узаемаадносінаў паміж Беларуссю і Масквой», — сказаў ён.
Паводле слоў Сабяніна, Маскву і Беларусь звязвае актыўнае супрацоўніцтва, у тым ліку ў сферы гандлю: за апошні год тавараабарот вырас больш чым на чвэрць. Акрамя таго, у 2011 годзе Масква заключыла «сур’ёзны кантракт» на пастаўку беларускіх тралейбусаў, адзначыў мэр.
Цяпер чытаюць
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком23
Каментары