Фралоў і Скрабец падалі заяўку на шэсьце ў гонар Дня яднаньня народаў Беларусі і Расеі
Шэсьце прызначана на 2 красавіка.
Былыя дэпутаты Палаты прадстаўнікоў Валеры Фралоў і Сяргей Скрабец 12 сакавіка падалі ў Менгарвыканкам заяўку на правядзеньне шэсьця ў гонар Дня яднаньня народаў Беларусі і Расеі 2 красавіка.
Нам зусім незразумелая, — сказаў Скрабец, — тая вайна з Расеяй, якую аб’явіла беларускае кіраўніцтва. Мы супраць гэтай вайны. Мы зьвязаныя з Расеяй гістарычна і палітычна. Прычым, з нашага пункта гледжаньня, гэта вайна зусім ня тычыцца энэрганосьбітаў. Аднак рэальнае аб’яднаньне народаў ніхто не адмяняў. У мяне маці нарадзілася ў Расеі, бабуля — украінка, і такая карціна назіраецца ў многіх беларускіх сем’ях. Таму нас абурае гэтая вайна ў этэры беларускіх тэлеканалаў. Мы гутарылі з моладзьдзю, вэтэранамі, людзьмі, якія працуюць у Расеі, тымі, хто вядзе з расейцамі сумесны бізнэс — ніхто не разумее такой беларускай палітыкі. Таму мы хочам падкрэсьліць: нікуды ад Расеі мы не падзенемся, і зь ёю трэба выстройваць добрасуседзкія і саюзьніцкія стасункі, а не ваяваць.
Абодва экс‑дэпутаты папрасілі ў Менгарвыканкаме дазволу на шэсьце ад Палацу Рэспублікі да парку імя Горкага і сьвяточны канцэрт у самім парку.
Раней Менгарвыканкам адмовіў Скрабцу ў дазволе на акцыю салідарнасьці зь незаконна асуджанымі, заяўку на якую ён падаваў 16 сакавіка.
«Па якой прычыне [адмовілі] — пакуль невядома, паколькі ў Менгарвыканкаме мне заявілі, што адмову яны выслалі поштаю. Я яшчэ нічога не атрымаў, а прычыну адмовы вусна мне назваць адмовіліся, — сказаў Скрабец. — Гэта азначае толькі тое, што ўлады баяцца нашай салідарнасьці і не дазваляюць правядзеньне менавіта такіх мітынгаў нават на ўскраіннай плошчы Бангалор».
Цяпер чытаюць
Выхадцы з «Альфа» КДБ Беларусі займаюць кіраўнічыя пасады ў новым расійскім суперсакрэтным спецпадраздзяленні, прызначаным для забойстваў за мяжою10
Каментары