Праваабаронцы заклікаюць усіх даслаць звароты ў абарону «ARCHE»

Часопіс «ARCHE», адзіны ў краіне «тоўсты» штомесячны недзяржаўны часопіс на беларускай мове, які рэгулярна і бесперапынна выходзіць з 1998 г., апынуўся пад пагрозай, паведамляе праваабарончы сайт spring96.org.

Пачынаючы ад 14 верасня, калі ў Гродне быў затрыманы тагачасны галоўны рэдактар часопіса Валер Булгакаў, і да цяперашняга моманту адбываюцца падзеі, якія могуць паставіць крыж на далейшым існаванні выдання.

З аднаго боку, ідзе «паглыбленая» праверка гаспадарчай дзейнасці часопіса Дэпартаментам фінансавых расследаванняў Камітэта дзяржаўнага кантролю, з другога — Беларускае тэлебачанне вуснамі вядучых і карэспандэнтаў праграмы крымінальнай хронікі «Зона Х» пачало кампанію шальмавання выдання і яго асноўных супрацоўнікаў.

Сярод іншага сцвярджаецца, напрыклад, што «ARCHE» і персанальна яго былы галоўны рэдактар Булгакаў спрычыніліся да друкавання «палотнаў з прэтэнзіяй на экстрэмізм». У той жа час добра вядома, што на старонках часопіса друкуюцца перадусім навуковыя і навукова-папулярныя тэксты беларускіх і замежных аўтараў, і канкрэтны змест выдання на працягу апошніх гадоў не выклікаў нейкіх істотных заўваг з боку Міністэрства інфармацыі.

Нягледзячы на гэта, пэўныя сілы сёння відавочна зацікаўленыя ў тым, каб Міністэрства інфармацыі скасавала пасведчанне аб рэгістрацыі часопіса і тым самым спыніла выпуск выдання. У такой сітуацыі мы заклікаем усіх людзей добрай волі праявіць салідарнасць з «ARCHE», што, у прыватнасці, можна зрабіць шляхам напісання зваротаў на імя міністра інфармацыі А. В. Праляскоўскага (адрас: 220004, г. Мінск, пр. Пераможцаў, 11).

Прыкладны змест хадайніцтва можа быць такі:

Паважаны Алег Вітольдавіч,

З праграмы беларускага тэлебачання «Зона Х"я з глыбокім засмучэннем даведаўся (лася), што разглядаецца пытанне аб скасаванні рэгістрацыі штомесячнага часопіса «ARCHE-Пачатак». Наколькі мне вядома, за апошнія гады Міністэрства інфармацыі не выносіла часопісу аніводнага папярэджання, выкліканага зместам надрукаваных у ім матэрыялаў, таму законных падстаў для ліквідацыі выдання няма. Спыненне ж выхаду часопіса несумненна стане вялікай стратай для беларускай навукі і культуры.

З павагай, (імя, прозвішча).

Таксама варта:

— накіраваць ліст у Дэпартамент фінансавых расследаванняў з просьбай разблакаваць рахунак «Arche-Пачатак» і даць часопісу магчымасць трапляць да чытача.

— Звярнуцца да кіраўніцтва БТ з патрабаваннем спыніць бяздоказныя публічныя абвінавачанні на адрас часопіса і яго аўтараў (Адрас: 220807, г. Мінск, вул. Макаёнка, 9. Белтэлерадыёкампанія, старшыня — Давыдзька Генадзь Браніслававіч).

— Накіраваць ліст у Адміністрацыю Прэзідэнта з выказваннем занепакоенасці сітуацыяй вакол «Arche-Пачатак» і заклікам паспрыяць захаванню часопіса. (Адрас: 220016, г. Мінск, вул. К. Маркса, 38.)

— Даслаць ліст падтрымкі ў саму рэдакцыю часопіса (Адрас: 220053, г. Мінск, вул. Нававіленская, 24-1А, пакой 2П.)

Абаронім сваё!

• 0
• 0
• 0
• 0
• 0
• 0
• 0
• 0