Niemaŭla taksama trapić u kałoniju? Što čakaje čatyroch niepaŭnaletnich dziaciej Daškievičaŭ, kali paru adpraviać za kraty?
Dla Źmitra i Nasty Daškievičaŭ prakuror zaprasiŭ pa 1,5 hoda kałonii kožnamu. Ale ŭ pary čaćviora niepaŭnaletnich dziaciej, małodšy syn Daniił uvohule naradziŭsia miesiac tamu. Pravaabaroncy ŭžo zahavaryli pra mahčymaść źjaŭleńnia ŭ Biełarusi pieršaha palitviaźnia-niemaŭlaci.
Ci mohuć Nastu, jakaja tolki naradziła, adpravić za kraty, i što tady budzie ź dziećmi?
Praviły ŭtrymańnia niepaŭnaletnich u niavoli ŭ Biełarusi rehulujucca 95-m artykułam Kryminalna-vykanaŭčaha kodeksa. Dla dziaciej, baćki jakich utrymlivajucca ŭ miescach pazbaŭleńnia voli, arhanizujucca śpiecyjalnyja damy dziciaci.
Zhodna z kodeksam, u takich damach stvarajucca «nieabchodnyja ŭmovy dla narmalnaha pražyvańnia i raźvićcia» (dla ciažarnych i kormiačych maci praviłami praduhledžanyja dadatkovyja pieradačy i pasyłki, miedycynskaja dapamoha ŭ paślarodavy pieryjad).
Asudžanyja žančyny mohuć sustrakacca ź dziećmi da troch hod u svabodny ad pracy čas. Taksama maci mohuć dazvolić pražyvać razam z małym naŭprost u domie dziciaci. Ale varta adznačyć, što niaredka dzieci pry kałonii źjaŭlajucca dadatkovym pradmietam dla manipulacyj i cisku na źniavolenych z boku administracyi — kamientuje «Našaj Nivie» abaznany čałaviek, znajomaja jakoha naradziła ŭ kałonii: «Spatkańniaŭ ź dziciem mohuć pazbavić za lubuju «pravinnaść».
Jašče adzin dazvoleny sa zhody maci varyjant — pieradača dziaciej adrazu svajakam albo ŭ orhany apieki.
U situacyi ź siamjoj Daškievičaŭ scenaryj z Daniiłam, jaki budzie žyć u domie dziciaci, nie vyklučany.
«Kaniečnie, u Kryminalnym kodeksie jość šerah «inšych mier kryminalnaj adkaznaści»: adterminoŭka vykanańnia pakarańnia, umoŭnaje pryznačeńnie, adterminoŭka dla žančyn, jakija majuć dzieciej va ŭzroście da troch hod. Ale pry adsutnaści pravavych padychodaŭ vynik moža być luby, i Nastu sapraŭdy mohuć adpravić u kałoniju», — kamientuje juryst Pavieł Sapiełka.
«Chacia prosta samo pakarańnie ŭ vyhladzie pazbaŭleńnia voli pa 342-m artykule — heta złačynstva. Pa-pieršaje, tamu što parušaje prava na mirny schod, pa-druhoje, tamu što pa mienš ciažkim składzie złačynstva abhruntavać pryznačeńnie takoha pakarańnia asobie biez sudzimaści možna tolki niejkimi vyklučnymi abstavinami, jakija tyčacca drennaj charaktarystyki asoby abvinavačanaha/aj, abstavin pravaparušeńnia».
Što tyčycca jašče troch niepaŭnaletnich dziaciej Daškievičaŭ, to ŭ vypadku, kali baćkoŭ adpraviać u kałoniju, ich mohuć pieradać pad apieku rodnych ci dziaržavy (u dziciačy dom ci ŭ inšyja formy ŭładkavańnia kštałtu pryjomnych siamiej). Paśla adbyćcia terminu źniavoleńnia siamja zmoža ŭźjadnacca znoŭ.
Nahadajem, Daškievičaŭ sudziać pa 342-m artykule KK za ŭdzieł u adnym z maršaŭ u žniŭni 2020 hoda. Źmicier znachodzicca ŭ źniavoleńni z 23 sakavika. Prysud pa ich spravie pavinien być vyniesieny 14 lipienia. Jaho ahučyć sudździa Taćciana Pirožnikava.
Čytajcie taksama:
Niejmaviernaja historyja kachańnia Źmitra i Nasty Daškievič
«Sała Ukrainie». Chto takaja Iryna Kanavałava — redaktarka rajonki, pa danosach jakoj piensijaniera pasadzili, a žančynu departujuć
Łukašenku stała drenna na samicie ŠAS u Kazachstanie — Dožd́7
Kamientary