Biełaruś pierapłočvaje za tranzit kaliju praz Rasiju sotni miljonaŭ dalaraŭ
Paśla spynieńnia tranzitu biełaruskich kalijnych uhnajeńniaŭ praź Litvu asnoŭnyja hruzavyja patoki pieraaryjentavalisia na rasijskija party. Heta pryniesła Rasijskim čyhunkam značnyja dadatkovyja dachody, piša «Supolnaść čyhunačnikaŭ Biełarusi».

Pavodle raźlikaŭ na padstavie abjomaŭ pieravozak 2025 hoda i taryfaŭ na listapad 2026-ha, Rasijskija čyhunki zarablajuć na transpartavańni biełaruskich kalijnych uhnajeńniaŭ i naftapraduktaŭ kala 383 miljonaŭ dalaraŭ štohod, abo bolš za miljon dalaraŭ u dzień. Navat z ulikam źnižak suma składaje kala 327 miljonaŭ dalaraŭ.
Rasijskija maršruty daŭžejšyja za raniejšy šlach praz Kłajpiedu, tamu pieravozki zajmajuć bolš času i kaštujuć daražej. Naprykład, da Uść-Łuhi ŭhnajeńni ciapier jeduć na 264 kiłamietry dalej, čym da Kłajpiedy. Da taho ž pieravałka hruzaŭ u rasijskich partach taksama daražejšaja.
Z kožnaj tony kalijnych uhnajeńniaŭ, dastaŭlenych da Uść-Łuhi, Rasijskija čyhunki atrymlivajuć 33 dalary, a Biełaruskaja čyhunka — 21,2 dalara. U vypadku naftapraduktaŭ dola rasijskaj čyhunki jašče bolšaja: u zaležnaści ad maršrutu jana atrymlivaje 60—88% płaty za pieravozku. Źnižki, jakija dziejničajuć dla asobnych napramkaŭ, mohuć istotna źmianšać hetyja vydatki.
U 2025 hodzie praz rasijskija party pieravieźli kala 8,66 miljona ton biełaruskich kalijnych uhnajeńniaŭ. Na ich transpartavańni Rasijskija čyhunki zarabili prykładna 238 miljonaŭ dalaraŭ. Jašče kala 145 miljonaŭ dalaraŭ prynieśli pieravozki biełaruskich naftapraduktaŭ. Z ulikam źnižak ahulny dachod rasijskich čyhunak ad hetych hruzaŭ aceńvajecca ŭ 326,5 miljona dalaraŭ.
Dla paraŭnańnia, raniej LTG, Kłajpiedski port i terminał nasypnych hruzaŭ razam atrymlivali ad biełaruskich kalijnych uhnajeńniaŭ kala 170 miljonaŭ jeŭra štohod. Ciapier Rasijskija čyhunki zarablajuć na pieravozcy mienšaj kolkaści ŭhnajeńniaŭ navat bolš. Pry hetym rasijskija taryfy za dastaŭku tony kaliju ŭ niekalki razoŭ vyšejšyja za tyja, što atrymlivała litoŭskaja čyhunka ŭ 2018—2021 hadach.
Daražejšaj stała i pieravałka naftapraduktaŭ. U rasijskich partach jana kaštuje ŭ 1,8—2,8 raza bolš, čym raniej u Kłajpiedzie. Dadatkovyja vydatki na hetym składniku aceńvajucca ŭ 16—19 miljonaŭ dalaraŭ za hod.
Biełaruskaja čyhunka taksama niasie dadatkovyja vydatki, bo vymušanaja źnižać taryfy, kab zachavać hruzapatoki. Akramia taho, jana ŭkładaje hrošy ŭ ramont i raźvićcio čyhunačnych maršrutaŭ da rasijskich partoŭ. Rasija, u svaju čarhu, płanuje pašyrać infrastrukturu, u tym liku padychody da sankt-pieciarburhskaha porta Bronka i Murmanska.
Pierśpiektyvy viartańnia biełaruskich uhnajeńniaŭ u Kłajpiedu pakul zastajucca niapeŭnymi. Niahledziačy na źniaćcie ZŠA častki sankcyj z «Biełaruśkalija», tranzit praź Litvu zastajecca zakrytym praz abmiežavańni Jeŭrasajuza. Litoŭskija ŭłady zajaŭlajuć, što pakul dziejničajuć jeŭrapiejskija sankcyi, adnaŭleńnie tranzitu niemahčymaje. Miž tym amierykanski bok praciahvaje abmiarkoŭvać ź Vilniaj mahčymaść viartańnia biełaruskich hruzaŭ u Kłajpiedu.
Na fonie zakrytaha litoŭskaha maršrutu rasijskija čyhunačnyja taryfy praciahvajuć raści: z kanca 2024 hoda ich niekalki razoŭ pavyšali. U vyniku pieraaryjentacyja ekspartu na rasijskija party aznačaje dla Biełarusi bolš darahuju i praciahłuju dastaŭku, a dla Rasijskich čyhunak — sotni miljonaŭ dalaraŭ dadatkovych dachodaŭ štohod.
Kiraŭnik MZS Litvy prakamientavaŭ mahčymaść źmiakčeńnia sankcyj suprać Biełarusi i jaje rolu ŭ mirnych pieramovach
U Biełarusi zapuścili pieršyja mahutnaści novaha kalijnaha kambinata
Litoŭski premjer admaŭlaje, što Tramp ciśnie na Litvu ź biełaruskim kalijem
«Biełaruśkalij» damahaŭsia pieranosu arbitražnaha pracesu suprać Litvy ŭ AAE ci Sinhapur, ale sud admoviŭ
Biełaruś u najbližejšy čas nakiruje novuju partyju kaliju ŭ ZŠA
Kamientary