Rasija rekordnymi tempami pradaje zołata, a Polšča za apošnija hady kupiła jaho najbolš za ŭsich u Jeŭropie
Heta adbyvajecca na fonie «załatoj lichamanki», jakaja achapiła banki i inviestaraŭ va ŭmovach niapeŭnaści i hłabalnaj niepradkazalnaści.

Rasija druhi kvartał zapar źjaŭlajecca najbujniejšym pradaŭcom załatych reziervaŭ svajho centrabanka, piša Bi-bi-si.
Pavodle danych Suśvietnaha savieta pa zołacie, u trecim kvartale 2026 hoda Bank Rasii pradaŭ 18,66 tony zołata.
Tolki adnojčy ŭ najnoŭšaj historyi RF pazbaŭlałasia ad zołata z takoj chutkaściu. Heta było ŭ 1998 hodzie, kali jana pradała 118 ton sa svaich reziervaŭ ciaham troch miesiacaŭ. Ale tady heta nie vyratavała jaje ad defołtu.
Ahułam Rasija skaračaje svaje zapasy zołata ŭžo dziesiać miesiacaŭ zapar. Sa śniežnia minułaha hoda i da kanca vieraśnia załatyja zapasy rasijskaha centrabanka skaracilisia na 62 tony.
Rasprodaž adbyvajecca, kab pryciahnuć srodki dla finansavańnia dziaržaŭnych vydatkaŭ.
Ahladalniki adznačajuć, što dynamika załatoha rasprodažu śviedčyć pra realnyja prablemy z rasijskimi finansami na fonie intensifikacyi ŭdaraŭ pa Ukrainie.
Sioleta deficyt rasijskaha biudžetu dasiahnuŭ 7,3 tryljona rubloŭ (79,57 młrd jeŭra), a sukupny deficyt za pieryjad paśla pačatku poŭnamaštabnaha ŭvarvańnia va Ukrainu ŭ 2022 hodzie pieravysiŭ 240 młrd jeŭra.
Pry hetym Rasija taksama zastajecca adnym ź viadučych vytvorcaŭ zołata.
U toj čas jak zachodnija sankcyi źmianiajuć miechanizm handlu kaštoŭnymi mietałami dla Maskvy, hałoŭnym pakupnikom rasijskaha zołata staŭ Kitaj, jaki, pavodle aficyjnych danych, sa studzienia pa lipień atrymaŭ z Rasii kala 100 ton zołata praz Hankonh.
Chto maje najbolš zołata
Pavodle spravazdačy Gold Demand Trends, ahułam centralnyja banki va ŭsim śviecie nabyli sioleta bolš za 321 tonu, što na 42% bolš u paraŭnańni z pakazčykam hadavoj daŭniny.
Klučavyja pakupniki — krainy Centralnaj i Uschodniaj Jeŭropy. U pryvatnaści, Čechija nabyła bolš za 5 ton, a Bank Polščy za hety pieryjad pavialičyŭ svaje reziervy na 40,5 tony.
Siarod pakupnikoŭ zołata Polšča źjaŭlajecca biassprečnym jeŭrapiejskim lidaram i navat uvajšła ŭ suśvietnuju dziasiatku krain z najbolšymi zapasami zołata ŭ reziervach.
Papaŭnieńnie reziervaŭ krainy zołatam — adna z hałoŭnych stratehij kiraŭnika Banka Polščy Adama Hłapinskaha, jaki 5 listapada paviedamiŭ, što centralny bank dasiahnuŭ svajho metavaha pakazčyka ŭ 700 ton.
Košt hetych zapasaŭ aceńvajecca pryblizna ŭ 356 miljardaŭ złotych (91,4 miljarda dalaraŭ, abo bolš za 80 miljardaŭ jeŭra).
U toj čas jak Polšča zamykaje pieršuju dziasiatku krain z najbolšymi załatymi reziervami, Rasija pakul zastajecca na piatym miescy. Jaje apiaredžvajuć ZŠA z zapasami ŭ bolš čym 8 tysiač ton, Hiermanija, jakaja maje bolš za 3 tysiačy ton, a taksama Italija, Francyja i Kitaj.
U pieršaj dziasiatcy taksama Šviejcaryja, Indyja i Japonija.
Novaja załataja lichamanka
Zamarožvańnie rasijskich zamiežnych aktyvaŭ paśla ŭvarvańnia va Ukrainu, a taksama niepradkazalnaja palityka palityčnych hulcoŭ, hałoŭnym čynam ZŠA, pryviała da taho, što ahladalniki ŭžo nazvali novaj «załatoj lichamankaj», kali inviestary i centrabanki pa ŭsim śviecie znoŭ viarnulisia da zołata jak nadziejnaha aktyvu.
Ciapier zołata kaštuje kala 3,5 tysiačy dalaraŭ za uncyju. Prahnozy na 2027 hod dasiahajuć 5,5—5,6 tysiačy dalaraŭ za uncyju.
Šmat što budzie zaležać ad kursu dalara — macniejšaja amierykanskaja valuta moža viarnuć prychilnaść niejkaj častki inviestaraŭ.
Kamientary