«A jak ty vykupiŭ adrazu akcent?» Repier Basta pa hołasie paznaŭ muzykanta z Čavusaŭ i raskazaŭ pra svajo dziacinstva ŭ zakrytym haradku pad Dziatłavam
Padčas zapisu muzyčnaha šou ŭ Maskvie vyśvietliłasia, što viadomy rasijski vykanaŭca jašče za savieckim časam niekalki hadoŭ pražyŭ u Hrodzienskaj vobłaści, a jahony małady surazmoŭca vučyŭsia ŭ maci śpiavački Kaci IOWA. Karotki dyjałoh sabraŭ sotni kamientaŭ miascovych žycharoŭ i byłych adnakłaśnikaŭ artysta.
Frahmient razmovy z novaha vypusku jutub-šou MC TAXI apublikavaŭ u instahramie «Hazholdar». Hościem 46‑hadovaha rasijskaha repiera Basty — Vasila Vakulenki — staŭ 29‑hadovy biełaruski pop– i chip-chop-vykanaŭca Uładzisłaŭ Łapaj, jaki vystupaje pad psieŭdanimam HOLLYFLAME.
Muzykant naradziŭsia ŭ Čavusach, skončyŭ Pinski dziaržaŭny ahrarna-techničny kaledž imia A. Ja. Klaščova pa budaŭničaj śpiecyjalnaści, paśla čaho pierajechaŭ u Maskvu. U 2023 hodzie servis «Jandeks Muzyka» nazyvaŭ jaho artystam hoda ŭ Biełarusi, a sioleta vykanaŭca atrymaŭ šyrokuju viadomaść dziakujučy treku «Tonu».
U roliku Vakulenka za styrnom svajho «Hielendvahiena» raptoŭna pierapyniaje hościa pytańniem: «A ŭ ciabie akcent, ty biełarus?».
Źbiantežany Łapaj paćviardžaje heta i adrazu pytajecca: «A jak ty vykupiŭ adrazu akcent? Oj, brudna ŭvohule!».
Čatyry hady ŭ Hiezhałach i fizkultura ad mamy Kaci IOWA
Na ździŭleńnie maładoha śpievaka Basta patłumačyŭ, što sam u dziacinstvie žyŭ u Biełarusi. Pavodle słoŭ repiera, u saviecki čas jahony baćka byŭ vajskoŭcam, tamu siamja čatyry hady praviała ŭ Hrodzienskaj vobłaści — u pasiołku Hiezhały Dziatłaŭskaha rajona, dzie tady raźmiaščałasia rakietnaja čaść. Artyst pa pamiaci dakładna nazvaŭ i susiednija nasielenyja punkty, zhadaŭšy Lidu i Bielicu.
Pačuŭšy heta, Uładzisłaŭ Łapaj nazvaŭ viadučaha «amal ziemlakom» i raskazaŭ, što sam pachodzić z maleńkaha horada Čavusy ŭ Mahiloŭskaj vobłaści, dzie žyvie krychu bolš za 10 tysiač čałaviek. Kab patłumačyć surazmoŭcu, čym viadomy jahony rajcentr, muzykant dadaŭ: «U nas tam IOWA adtul, darečy. Jaje mama vykładała mnie fizru».
U bijahrafijach salistki hurta IOWA Kaciaryny Ivančykavaj, jakaja taksama vyrasła ŭ Čavusach, adznačajecca, što jaje maci Nina Ivančykava pracavała vychavalnicaj u miascovym dziciačym sadku sa spartyŭnym uchiłam, čyje kamandy rehularna pieramahali na rajonnych spabornictvach.
U finale rolika rasijski repier pasprabavaŭ udakładnić hieahrafiju i zapytaŭsia, ci znachodzicca Mahiloŭskaja vobłaść «bolš na poŭdzień, čym Hrodzienskaja». Hość papraviŭ jaho, patłumačyŭšy, što jahonaja radzima lažyć bližej da Smalenska, tady jak Hrodzienščyna — heta Zachodniaja Biełaruś, bližejšaja da Polščy.
«Hiezhały — voś adkul pajšoŭ «Hazholdar»!»
Karotki dyjałoh vyklikaŭ burnuju reakcyju ŭ kamientarach pad dopisam, kudy pryjšli sotni biełarusaŭ. Častka karystalnikaŭ źviarnuła ŭvahu na toje, jak małady artyst pasaromieŭsia svajho vymaŭleńnia.
«Vyličyŭ pa akcencie, tolki čamu ŭsie saromiejucca akcentu — «brudna ŭvohule» kaža», — napisała adna karystalnica.
Inšy kamientatar dadaŭ, što žycharoŭ Viciebska ŭ tym ža Hrodnie, naadvarot, adrazu paznajuć praz «mocna ruski akcent».
Nie zastałasia biez uvahi i hieahrafičnaja błytanina ŭ razmovie. Kamientatary pažartavali z taho, što Basta zapisaŭ Mahiloŭ na poŭdzień ad Hrodna, a adlehłaść pamiž Hiezhałami i Čavusami, jakija lažać u procilehłych kancach krainy, paraŭnali z dystancyjaj pamiž Pskovam i Ciumieńniu.
Asobnaja halinka abmierkavańniaŭ razharnułasia siarod uradžencaŭ Dziatłaŭskaha rajona. U kamientarach adznačylisia byłyja žychary vajskovaha haradka, jakija vučylisia z Vasilom Vakulenkam u adnoj škole.
«A to ja jak ni skažu ŭ Maskvie, što Vasil u našaj škole vučyŭsia, mnie ŭsie pra Rastoŭ adkazvajuć», — napisała adna kamientatarka.
Inšyja zhadali miascovyja realii: sakretnuju rakietnuju bazu ŭ lesie, były dziciačy sanatoryj «Łastaŭka», vadaschovišča z płacinaj i dyskateku z «čatyrma roznakalarovymi lampačkami», a taksama toj fakt, što paźniej na miescy rasfarmiravanaj vajskovaj čaści ŭ Hiezhałach adkryli papraŭčuju kałoniju-paśsialeńnie.
Adrazu niekalki kamientataraŭ vykazali zdahadku, što mienavita ad nazvy biełaruskaha pasiołka Hiezhały pajšła i nazva muzyčnaha łejbła Basty «Hazholdar».
Žychary Hrodna i Lidy zasypali repiera zaprašeńniami pryjechać z kancertam u hrodzienski Ladovy pałac, na stadyjon «Nioman» abo na fiestyval Lidbeer. Praŭda, niekatoryja kamientatary zapytalisia navošta im u Biełarusi vykanaŭca, jaki ŭ Rasii prasłaviŭsia publičnaj padtrymkaj pavyšeńnia piensijnaha ŭzrostu i ŭmieńniem «pieraabuvacca».
Kamientary