«Znajšli telefon, praz 9 dzion — zaplečnik». U Hiermanii bolš za miesiac šukajuć 38‑hadovaha biełarusa
U pačatku kastryčnika ŭ Hiermanii źnik 38‑hadovy Arciom Alaksiejeŭ. Pavodle słoŭ jahonaj žonki Taćciany, mužčyna pracuje dalnabojščykam i byŭ u rejsie. Apošni raz jon vychodziŭ na suviaź u pačatku kastryčnika. Taćciana źviarnułasia ŭ milicyju i pošukava-vyratavalny atrad «Anioł», a taksama padtrymlivaje suviaź ź niamieckaj palicyjaj, adnak dahetul ničoha nie viedaje pra los Arcioma, piša «Anłajnier».

Pa słovach Taćciany, Arciom znachodziŭsia ŭ rejsie sa žniŭnia. Apošni raz sužency razmaŭlali jašče 4 kastryčnika.
«Usio było dobra, my pahavaryli, i jon pajšoŭ spać. Na nastupny dzień muž pajechaŭ dalej pa maršrucie ŭ Hiermanii i pa niejkaj pryčynie paviarnuŭ rul naprava — usie čatyry pravyja koły ŭdarylisia ab adbojnik i spuścili. Heta infarmacyja ad dalnabojščykaŭ. Arciom telefanavaŭ miechaniku, zdymaŭ dla jaho videa i pakazvaŭ paškodžańni. Jamu adkazali, što dapamoha budzie paźniej».
Usio apisanaje vyšej, pavodle słoŭ Taćciany, adbyłosia ŭ niamieckim horadzie Anvajler-am-Tryfiels. Pra nastupnyja dziejańni muža žančyna taksama viedaje sa słoŭ inšych dalnabojščykaŭ.
Viadoma, što Arciom vyrašyŭ zastacca ŭ kabinie mašyny. Paźniej u niejki momant pryjechała palicyja, paśla biełarus apynuŭsia ŭ palicejskim učastku praz parušeńnie. Tam u jaho zabrali pravy — pra heta Taćciana daviedałasia ŭžo ad palicyi.
«Razam z supracoŭnikami palicyi jon jeździŭ da bankamata — chacieŭ źniać hrošy, kab apłacić štraf, ale nie atrymałasia. Jany znoŭ pryjechali ŭ adździaleńnie, dzie Arciomu skazali pasialicca ŭ hateli. I tut moj muž pajšoŭ u nieviadomym kirunku — prosta hulać pa horadzie.
Na nastupny dzień, 6 kastryčnika, jamu patelefanavaŭ naš ahulny siabar. Pavodle jahonych słoŭ, Arciom byŭ u pryhniečanym stanie i navat płakaŭ praz toje, što narabiŭ. Paśla muž bolš nie adkazvaŭ na telefonnyja zvanki: hudki išli, ale słuchaŭku jon nie braŭ. Siabar usio ž zdoleŭ datelefanavacca da jaho ŭ toj ža viečar. Nakštałt usio było dobra, ale čamuści suviaź chutka pierapyniłasia».
Z nočy 6 kastryčnika Arciom bolš nie vychodziŭ na suviaź. Paźniej Taćciana daviedałasia, što muž zhubiŭ telefon. Jaho znajšli i adnieśli ŭ biuro znachodak, dzie zaradzili i adkazali na adzin z uvachodnych zvankoŭ. Jašče praź dzieviać dzion u adnym z parkaŭ horada Łandau znajšli zaplečnik źnikłaha — u im byli ŭsie dakumienty i płanšet.
U toj ža dzień, 15 kastryčnika, Taćciana źviarnułasia z zajavaj pra źniknieńnie muža ŭ milicyju ŭ Biełarusi. Pavodle słoŭ žančyny, uvieś hety čas rodnyja čakali i spadziavalisia, što mužčyna ŭsio ž vyjdzie na suviaź.
Pra źniknieńnie biełarusa taksama paviedamili niamieckaj palicyi, a paźniej infarmacyju pra pošuki pačali raspaŭsiudžvać u tyktoku. Taćcianie dapamahajuć Edyta, jakaja žyvie ŭ Hiermanii i sama źviazałasia ź siamjoj źnikłaha, Śviatłana i jašče niekalki nieabyjakavych ludziej.

«U sacyjalnych sietkach nam napisali, što ŭ horadzie Chierschajm bačyli biazdomnaha. Palicyja źjeździła i pravieryła hetuju infarmacyju. Mnie paviedamili, što heta miascovy žychar, jaki nie razmaŭlaje pa-rusku. Paźniej źjaviłasia infarmacyja ad dalnabojščykaŭ, što padobnaha čałavieka bačyli ŭ inšym horadzie. Pavodle raskazaŭ, mužčyna źbiraŭ płastykavyja butelki. Heta nie ŭkładvajecca ŭ mianie ŭ hałavie. Tamu ja dumaju, što Arcioma z kimści błytajuć. Pakul niamieckaja palicyja nie praviarała hetu infarmacyju».
Pavodle słoŭ žančyny, pastupali paviedamleńni, što Arciom moža znachodzicca ŭ horadzie Tryr. Infarmacyju, jakuju paviedamiła adna ź miascovych žycharak, užo pravieryli: u miascovych žycharoŭ pytalisia, pakazvajučy fota biełarusa. Adnak takoha čałavieka nie bačyli ni na vakzale, ni ŭ kramach. Taksama byli nakiravanyja zapyty ŭ niekalki balnic, morhaŭ i načležak — padobnaha čałavieka tam nie znajšli.
«Arciom ža biez dakumientaŭ. Taksama ja dakładna viedaju, što z momantu jaho źniknieńnia — z 6 na 7 kastryčnika — jon zusim nie maje hrošaj. Reč u tym, što jahonaja bankaŭskaja prahrama była pryviazanaja da sim-karty, aformlenaj na mianie. My byli ŭpeŭnienyja, što zmožam adsočvać jaho pieramiaščeńni pa apłacie kuplaŭ, ale apošniaja apieracyja była 19 vieraśnia. Telefon taksama zhubleny, a značyć, u jaho niama ni kapiejki».

Pavodle słoŭ Taćciany, joj usio čaściej vykazvajuć zdahadki, što muž moh takim čynam prosta pajści ź siamji. Adnak sama žančyna vyklučaje taki varyjant.
«Dumaju, što z Arciomam niešta zdaryłasia: albo strata pamiaci, albo niešta samaje strašnaje… Muž nikoli raniej nie źnikaŭ voś tak raptoŭna. Ja vielmi bajusia, kab u jaho nie pačałasia depresija… Nie vieru i ŭ toje, što jon moh stolki dzion niedzie z kimści vypivać. Urešcie, jon moh by patelefanavać mnie i skazać, što ŭsio dobra. Adzinyja jaho siabry — heta kalehi-dalnabojščyki, jany b taksama mnie paviedamili. I chavacca jamu niama ad čaho: mašynu adramantavali, a paškodžańni adbojnika apłacić firma. Tamu chavacca, uciakać — nie, naŭrad ci sprava ŭ hetym».
Tych, chto vałodaje infarmacyjaj pra źnikłaha, prosiać paviedamić pa telefonach pošukava-vyratavalnaha atrada «Anioł»: 7733, +375 29 294-80-04, +375 29 270— 77‑33 abo 102.
Kamientary