Pastaŭki biełaruskaha bienzinu ŭ Rasiju dasiahnuli rekordnaha ŭzroŭniu
Pastaŭki biełaruskaha bienzinu ŭ Rasiju ŭ studzieni — kastryčniku 2026 hoda dasiahnuli prykładna 1,25 miljona ton. Heta bolš čym u 5,5 raza pieravyšaje abjom pastavak za studzień — listapad 2025 hoda, kali na rasijski rynak było adpraŭlena 222,4 tysiačy ton paliva, piša Financial Times sa spasyłkaj na acenki analitykaŭ.

Rezki rost ekspartu pačaŭsia letam 2026 hoda. U červieni Rasija atrymała bolš za 181 tysiaču ton biełaruskaha bienzinu, a ŭ lipieni abjom pastavak dasiahnuŭ rekordnych 212 tysiač ton. Dla paraŭnańnia, u červieni 2025 hoda hety pakazčyk składaŭ usiaho kala tysiačy ton.
Pavieličeńnie pastavak źviazanaje ź pierabojami ŭ pracy rasijskich naftapierapracoŭčych zavodaŭ praz ataki bieśpiłotnikaŭ i pazapłanavyja ramonty. Kab zadavolić popyt na rasijskim rynku, Biełaruś pieranakiravała tudy častku bienzinu, jaki raniej pryznačaŭsia dla inšych krain, najpierš dziaržaŭ Centralnaj Azii.
Pavodle acenak Financial Times, biełaruskija naftapierapracoŭčyja zavody nablizilisia da poŭnaj zahruzki. U vyniku Biełaruś stała najbujniejšym zamiežnym pastaŭščykom bienzinu ŭ Rasiju.
Pavodle źviestak Reuters, za studzień — vierasień 2026 hoda abjom pastavak biełaruskaha bienzinu ŭ Rasiju pa čyhuncy pieravysiŭ miljon ton.
Kamientary