Akcior z «Kupały» vykłaŭ u volny dostup ŠI-film, jaki prynios jamu 450 tysiač dalaraŭ
Mikałaj Šastak apublikavaŭ «Pieršy ščyry dzień» — historyju pra śviet, u jakim čałaviečyja namiery pačynajuć adbivacca na tvarach. Režysiorskaja viersija doŭžycca 20 chvilin. Jaje možna pahladzieć pa-anhlijsku abo z ruskaj ahučkaj, zaŭvažyŭ kanał «Śviaŝiennyj Biełavud».
Film dastupny na jutubie. Pavodle aŭtara, ruskuju viersiju ahučyli sapraŭdnyja aktory — ich hałasy nie zhienieravanyja štučnym intelektam. Kab jaje ŭklučyć, treba vybrać u naładach videa adpaviednuju aŭdyjadarožku.
Padziei stužki pačynajucca adnoj ranicaj u Ńju-Jorku. Pa ŭsim śviecie ŭ ludziej nievytłumačalna źmianiajucca tvary. Televiadoŭca vychodzić u efir, kab paviedamić pra zahadkavuju źjavu, i sama pačynaje źmianiacca pierad miljonami hledačoŭ. Pastupova vyśviatlajecca: sprava nie ŭ virusie, a ŭ sapraŭdnych namierach ludziej.
Šastak prosić hledačoŭ dzialicca ŭražańniami i dapamahać filmu znachodzić aŭdytoryju.
«Dalej dla mianie pačynajecca samaje važnaje — tvaje ŭražańni. Recenzija, karotki vodhuk, dumki — važna ŭsio. A kali film tabie sapraŭdy spadabaŭsia — padzialisia im. Repost, spasyłka siabru, dopis u siabie. Film razydziecca roŭna nastolki, nakolki jaho paniasuć hledačy», — napisaŭ režysior.
«Pieršy ščyry dzień» atrymaŭ Hran-pry Astana AI Film Festival u Kazachstanie i pryz u 450 tysiač dalaraŭ. Na fiestyval padali bolš za vosiem tysiač rabot sa 125 krain.
Mikałaj Šastak — akcior i režysior z Łatvii. Biełaruskamu hledaču jon najpierš viadomy pa hałoŭnaj roli ŭ «Kupale». Stužka «Biełaruśfilma» pra žyćcio Janki Kupały musiła vyjści ŭ prakat u 2020 hodzie, ale z palityčnych pryčyn jaje pakłali na palicu.
Ciapier čytajuć
Što znajšli ŭ viaźnicy Kreŭskaha zamka, dzie ŭ 1382‑m zadušyli Kiejstuta? Jana była pachavanaja pad zavałami paśla šturmu Śvidryhajły amal 600 hadoŭ55
Kamientary