Расійскае ўварванне ва Украіну пайшло не так, як планаваў Уладзімір Пуцін. Па словах былога кіраўніка вайсковай разведкі Фінляндыі, генерал-маёра Пека Товеры, расіяне, аднак, рыхтуюць новы наступ, які, хутчэй за ўсё, адбудзецца ў пачатку наступнага года, паведамляе onet.pl.
«Абараняцца ад украінскіх войскаў для Пуціна зневажальна і падточвае падтрымку вайны расіянамі. Акрамя таго, існуе пагроза новых украінскіх наступаў. Але стварэнне наступальнага патэнцыялу патрабуе часу. Расія мае абмежаваныя магчымасці навучаць і экіпіраваць рэзервістаў для папаўнення часцей ва Украіне», — напісаў Товеры ў серыі твітаў.
Фінскі вайсковец таксама заявіў, што расіяне пачнуць новае наступленне ў 2023 годзе. «Неабавязкова ў сярэдзіне зімы (…). Але, магчыма, вясной. Гэта дае Расіі 3-4 месяцы, каб мабілізаваць і падрыхтаваць больш рэзервістаў і атрымаць неабходныя матэрыялы», — дадаў Товеры.
На яго думку, атака расіян з Беларусі, напрыклад на Кіеў, «спакуслівая», але складаная з-за вялікай адлегласці і добрай падрыхтоўкі ўкраінцаў. «Паўночна-ўсходняя Украіна лагістычна складаная з-за вялікіх адлегласцяў. Калі не атрымалася мінулай зімой, то, напэўна, не атрымаецца і ў 2023 годзе», — напісаў Товеры.
Куды можа напасці Пуцін? Вайсковец раскрывае магчымы план
Як сцвярджае Товеры, рускія могуць наступаць у кірунку Запарожжа. «Лагістыку прасцей арганізаваць і забяспечыць, і прасоўванне там знізіла б небяспеку таго, што ўкраінцы перарэжуць сухапутны калідор з Крымам», — напісаў фінскі вайсковец і адзначыў, што «ўсюды, дзе адбываецца атака, будзе некалькі дыверсійных атак, каб абмежаваць украінскія рэзервы».
Па словах Товеры, будучы расійскі наступ не будзе маштабны, не будзе пагражаць Украіне фундаментальна і не зменіць ходу вайны.
«Украінцы дэманструюць добрую тактыку і добра манеўруюць у палявых умовах. Рускія таксама вучацца, але, напэўна, не гатовыя да такіх хуткіх наступальных дзеянняў», — падагульніў вайсковец.
Цяпер чытаюць
Чаму YouTube выдаліў каналы БелТА, СТБ і АНТ? Вось што вядома11
Каментары