У чацьвер у Менску пад старшынствам Аляксандра Мілінкевіча прайшло паседжаньне камітэту ў абарону актывістаў Маладога Фронту, прысьвечанае судам над Іванам Шылам, Яраславам Грышчэнем і Настасьсяй Азаркай, якія маюць адбыцца ў верасьні.
У чацьвер, 16 жніўня, у Менску пад старшынствам Аляксандра Мілінкевіча прайшло паседжаньне камітэту ў абарону актывістаў Маладога Фронту, прысьвечанае судам над Іванам Шылам, Яраславам Грышчэнем і Настасьсяй Азаркай, якія маюць адбыцца ў верасьні.
Бацькі Івана, якія былі на паседжаньні, даволі пэсымістычна глядзяць на выніковасьць захадаў у абарону шаснаццацігадовага хлопца.
Уладзімер Шыла: «Безумоўна, зараз мы адчуваем моцную падтрымку й увагу да нашае сям’і, але цяпер мы знаходзімся ў стане чаканьня, бо нічым моцна супрацьстаяць будучай судовай расправе ня можам».
Сяржук Лісічонак зазначыў, што пры канцы лета, калі большасьць эўрадыпляматаў вернецца з адпачынкаў, плянуецца распачаць шырокую кампанію інфармаваньня эўрапейскіх структураў пра перасьлед маладафронтаўцаў. На ягоную думку, неабходна ня толькі зьвярнуцца ва ўсе дыпляматычныя прадстаўніцтвы, але й стварыць англамоўны інфармацыйны бюлетэнь, а таксама выкарыстоўваць магчымасьці блогаў.
Павал Севярынец адзначыў, што выпадак Івана Шылы — гэта ўжо другі прыклад таго, калі судзьдзі адмаўляюцца чыніць расправу над маладымі людзьмі паводле 193 артыкулу:
«Гэтая акалічнасьць у будучыні можа паставіць пад пытаньне само выкарыстаньне такога артыкулу Крымінальнага кодэксу».
Праваабаронца Людміла Гразнова зьвярнулася да людзей старэйшага веку з заклікам пісаць лісты ня толькі ў суды й КДБ, але і бацькам перасьледаваных:
«Вельмі часта бывае так, што сямейныя адносіны, калі старэйшыя не разумеюць усю важнасьць і адказнасьць справы маладых, зьяўляюцца значна большым выпрабаваньнем для людзей, чым суд».
Аргкамітэт таксама вырашыў у найбліжэйшы час наведаць Івана, Яраслава і Насту, якія знаходзяцца пад падпіскай аб нявыезьдзе. У адну з такіх паездак пагадзіўся адправіцца і Аляксандар Мілінкевіч.
Латвія «па тэхнічных прычынах» закрыла мяжу з Беларуссю12
Каментары