Беларусь прыняла рашэнне выдзеліць матэрыялы ў дачыненні да расійскіх грамадзян, якія праходзяць па «калійнай справе», у асобную вытворчасць і перадаць іх у Генпракуратуру Расіі.
Аб гэтым 16 верасня паведаміў журналістам у Маскве намеснік генеральнага пракурора РФ Аляксандр Звягінцаў, паведамляюць расійскія інфармагенцтвы.
Паводле слоў Звягінцава, «сёння адбылася тэлефонная размова з генпракурорам Беларусі Аляксандрам Конюкам», падчас якой стала вядома, што адпаведныя ўказанні кіраўнік беларускай Генпракуратуры ўжо даў следчым органам.
Неўзабаве пасля заявы Звягінцава інфармаваная крыніца паведаміла расійскаму Інтэрфаксу, што пасля перадачы з Беларусі ў Генпракуратуру Расіі матэрыялаў па «калійнай справе» паўстане пытанне аб выдачы гендырэктара «Уралкалія» Уладзіслава Баўмгертнера, які цяпер знаходзіцца ў СІЗА КДБ.
Урэшце, дадаў ён, можа быць і так, што следчыя з Расіі на нейкім этапе прыедуць у Мінск, каб працаваць з арыштаваным бізнесменам.
Так ці інакш, пытанне аб выдачы Баўмгертнера будзе вырашацца ў ходзе перамоў паміж двума пракурорамі і, магчыма, на палітычным узроўні, дадала крыніца.
Гендырэктар «Уралкалія», кіраўнік наглядальнага савета ЗАТ «Беларуская калійная кампанія» (БКК) Уладзіслаў Баўмгертнер быў затрыманы ў Мінску 26 жніўня.
Паводле інфармацыі Следчага камітэта, ён абвінавачваецца па ч. 3 арт. 424 Крымінальнага кодэкса (злоўжыванне ўладай і службовымі паўнамоцтвамі).
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА23
Каментары