Ваенны суд прызнаў грамадзян Беларусі Фензеляу і Качуру вінаватымі ў шпіянажы ў інтарэсах Літвы, паведаміў праз агенцтвы «Інтэрфакс-Захад» і БелТА Камітэт дзяржаўнай бяспекі.
«Беларускім ваенным судом 30 снежня 2013 вынесены прысуд грамадзянам Рэспублікі Беларусь Фензеляу і Качуру, якія ажыццяўлялі шпіёнскую дзейнасць у інтарэсах Літоўскай Рэспублікі. За здзяйсненне злачынстваў, прадугледжаных ч.1 арт.356 (здрада дзяржаве) КК Рэспублікі Беларусь, яны прысуджаныя да 10 і 8 гадоў пазбаўлення волі адпаведна», заявіў у інтэрв'ю агенцтву «Інтэрфакс-Захад» кіраўнік прэс-службы КДБ Артур Стрэх.
Фензеляу і Качуру затрымалі ў сакавіку 2012 года.
Фензеляу — былы вайсковец, які пасля звальнення з беларускіх Узброеных сіл у 2002 выехаў на пастаяннае месца жыхарства ў Літву. Паводле інфармацыі КДБ, «ад літоўскай вайсковай разведкі ён атрымаў заданне на стварэнне на тэрыторыі Беларусі агентурнай сеткі, здольнай ажыццяўляць збор звестак аб функцыянаванні ВПС і войскаў СПА Беларусі. У інтарэсах рэалізацыі злачыннай задумы яму ўжо як рэзідэнту літоўскімі спецслужбамі было аказана фінансавае спрыянне ў арганізацыі на беларускай тэрыторыі камерцыйнага праекта».
У выніку праведзеных аператыўна-вышуковых мерапрыемстваў «канфіскаваныя электронныя носьбіты, іншыя прадметы і матэрыялы, якія выкрываюць іх шпіёнскую дзейнасць, накіраваную на атрыманне сакрэтнай інфармацыі ў вайсковай сферы, у тым ліку ў рамках адзінай сістэмы бяспекі саюзнай дзяржавы». Дакументальна былі пацверджаны факты правядзення агентурнай групай аперацый па здабычы інфармацыі з выкарыстаннем тэхнічных сродкаў, з мэтай далейшай перапраўкі звестак за мяжу.
Па заключэнні экспертаў, «сабраныя і падрыхтаваныя для перадачы літоўскай спецслужбе матэрыялы адносяцца да звестак, што складаюць дзяржаўныя сакрэты Рэспублікі Беларусь», — падсумоўвае КДБ.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага45
Каментары