Ва «Ўкраінскім доме» майданаўцы размесцяць прэс-цэнтр і возьмуць пад ахову фонды музея
Ва «Ўкраінскім доме», які занялі ноччу майданаўцы, будзе прэс-цэнтр і пункт абагрэву.
«Тут будзе размешчаны прэс-цэнтр для журналістаў, а таксама пункт для прыёму ежы і абагравання тых сотняў, якія мы не можам размясціць у доме прафсаюзаў», —
паведаміў інфармагенцтву Інтэрфакс-Украіна ў нядзелю, 26 студзеня, камендант Аляксей Якушэўскі.
Пры гэтым ён падкрэсліў, што доступ на 4-ы і 5-ы паверхі Украінскага дома, дзе размешчаныя фонды і архіў Музея гісторыі Кіева, будуць зачыненыя — там знаходзяцца матэрыяльныя каштоўнасці музея.
Са свайго боку захавальнік Музея гісторыі Кіева паведаміла, што паміж прадстаўнікамі музея і камендантам будынка падпісаны акт, якім зафіксаваны факт адкрыцця дзвярэй у сховішча музея.
Пасля падпісання дакумента, камендант Украінскага дома абавязаўся апячатаць ўваход у сховішча і ахоўваць яго.
На дадзены момант актывісты працягваюць займацца расчысткай памяшкання ад шкла і смецця, а таксама закрываюць выбітыя вокны фанерай і кавалкамі тканіны.
На другім і трэцім паверхах размясціліся і адпачываюць некалькі дзясяткаў мітынгоўцаў.
Каментары