«Нашы сумесныя намаганні па інтэграцыі ў эканамічнай сферы, безумоўна, прыносяць і прынясуць свой плён у яшчэ большым памеры, і мы не толькі павялічым аб'ёмы нашай эканомікі, але і яе якасць», — заявіў прэзідэнт Расіі Уладзімір Пуцін 2 ліпеня на сустрэчы ў Мінску з Аляксандрам Лукашэнкам.
Паводле яго слоў, зусім хутка пачне дзейнічаць Еўразійскі эканамічны саюз. «Без усякага сумнення, гэта будзе яшчэ адным крокам наперад у аб'яднанні намаганняў нашых народаў, нашых дзяржаў на базе ўсяго таго станоўчага, што дасталася нам з ранейшых часоў і што было зроблена рукамі і паліта, прама скажам, крывёю, калі мець на ўвазе ваенны час, нашых продкаў, бацькоў і дзядоў», — цытуе расійскага прэзідэнта дзяржаўнае інфармагенцтва БелТА.
Ён павіншаваў беларусаў з 70-годдзем вызвалення Беларусі ад нямецка-фашысцкіх захопнікаў:
«Мы ўжо сёння ўспаміналі пра тыя неверагодныя ахвяры, якія прынёс на алтар перамогі беларускі народ, як шмат было зроблена пасля Вялікай Айчыннай вайны для аднаўлення рэспублікі і такога светлага, прыгожага горада Мінска».
Лукашэнка назваў прыезд Пуціна ў Беларусь у святочныя для краіны дні сімвалічным.
«Гэта сімвалізуе наша адзінства, гаворыць пра тое, што мы як былі тады разам, так і заўсёды будзем разам, — сказаў ён. — Мы вельмі цэнім ваш прыезд у гэтыя святочныя дні. Няхай і цяжкія былі часы, але ўсё-такі перамога пасля ўсіх цяжкасцяў была жаданая і агульная».
«Як я неяк ужо сказаў, калі мяне тут дапякалі асобныя людзі: не хвалюйцеся, калі трэба, мы станем спінай да спіны і будзем абараняцца, мы будзем змагацца, як некалі змагаліся разам», — зазначыў Лукашэнка.
Ён выказаў удзячнасць Пуціну за прыезд, а таксама за дапамогу і падтрымку, што аказваюцца краіне і эканоміцы: «Мы гэта памятаем, і паверце, што паціхеньку і Расія, і Беларусь з сусветнага крызісу выкараскаваюцца. Мы ўстанем на ногі і, упэўнены, эканамічна будзем яшчэ мацнейшыя».
Цяпер чытаюць
Пачобут паразважаў, ад чаго залежыць будучыня Беларусі1
Каментары