За разбойны напад на састарэлую жанчыну асуджаны 21-гадовы непрацоўны жыхар Баранавіч.
Як паведаміў начальнік аддзела пракуратуры Брэсцкай вобласці Алена Лешчанка, у лютым 2014 года адзінокая 80-гадовая жанчына, якая жыве ў Баранавічах, пусціла пажыць у сваю кватэру гэтага маладога чалавека і яго знаёмую.
Вечарам 8 сакавіка кватарант, які знаходзіўся ў стане алкагольнага ап'янення, стаў патрабаваць у гаспадыні кватэры грошы. Пасля таго як тая заявіла, што грошай у яе няма, мужчына стаў біць пенсіянерку рукамі па галаве і тулаву. Затым забраў схаваныя ў надзетым на яе адзенні грошы, 127 тыс. рублёў, і ўцёк з месца злачынства.
Пацярпелая выбегла на балкон кватэры і стала клікаць дапамогу. Суседзі выклікалі хуткую дапамогу, якая даставіла жанчыну ў бальніцу. Пацярпелую шпіталізавалі. Ёй былі прычынены лёгкія цялесныя пашкоджанні, якія пацягнулі кароткачасовае расстройства здароўя.
Супрацоўнікі міліцыі затрымалі маладога чалавека 10 сакавіка. У яго канфіскавалі грошы, якімі ён завалодаў.
11 ліпеня суд Баранавіцкага раёна і горада Баранавічы прызнаў маладога чалавека вінаватым ва ўчыненні злачынства на падставе ч. 1 арт. 207 Крымінальнага кодэкса (разбой) і прыгаварыў да трох гадоў шасці месяцаў пазбаўлення волі з адбываннем пакарання ў папраўчай калоніі ўзмоцненага рэжыму.
«Асуджаны абскардзіў прыгавор. Ён прасіў перакваліфікаваць яго дзеянні на грабеж і прызначыць пакаранне, не звязанае з пазбаўленнем волі, — адзначыла Лешчанка. — 2 верасня калегія па крымінальных справах Брэсцкага абласнога суда пакінула прыгавор без змены, і ён набыў моц».
Каментары