Беларускія грацыі не трапілі ў лік прызёраў у фінале мнагабор'я чэмпіянату свету па мастацкай гімнастыцы ў турэцкім Ізміры.
Лідарка беларускай зборнай Меліціна Станюта ў суме чатырох практыкаванняў (мяч, абруч, стужка, булавы) набрала 69,482 бала і заняла сёмую выніковую пазіцыю ў пратаколе спаборніцтваў. Радком ніжэй апынулася яшчэ адна беларуска Кацярына Галкіна. Трыумфатарамі сусветнага першынства сталі расійскія «мастачкі» — Яна Кудраўцава заваявала чэмпіёнскі тытул (75,266 бала), срэбра ў Маргарыты Мамун (74,149). Бронзавы медаль у актыве ўкраінскай гімнасткі Ганны Рызатдзінавай (72,449).
Па выніках асабістых спаборніцтваў прыз за элегантнасць атрымала Яна Кудраўцава. У Ізміры 16-гадовая расіянка была лепшай, заваяваўшы золата ў чатырох намінацыях — мнагабор'е, абруч, мяч і булавы, а таксама серабро ў практыкаваннях са стужкай.
У скарбонцы беларускіх спартсменак пакуль дзве ўзнагароды сусветнага першынства — срэбра ў камандным турніры (Меліціна Станюта, Кацярына Галкіна, Арына Шарапа) і бронза Станюты ў практыкаваннях з мячом.
Цяпер на чэмпіянаце свету ў барацьбу за ўзнагароды ўступяць «групавічкі» — сёння будуць вызначаны лепшыя каманды ў мнагабор'і, а ў заключны дзень спаборніцтваў, 28 верасня, адбудуцца фіналы групавых спаборніцтваў з асобнымі прадметамі.
Цяпер чытаюць
Ад прыватнікаў патрабуюць завесці ідэолага ў штаце — распыталі, што робяць кампаніі2
Каментары