Законапраект аб прыватызацыі ўрад адклікаў з Палаты прадстаўнікоў Нацыянальнага сходу Беларусі, паведаміла на брыфінгу 30 ліпеня ў Мінску начальнік упраўлення арганізацыйных форм кіравання Міністэрства эканомікі Ларыса Ляўковіч.
Нагадаем, згодна з гэтым законапраектам прадстаўнікі дзяржавы маглі прызначацца нават у тыя акцыянерныя таварыствы, створаныя ў працэсе прыватызацыі, у якіх у дзяржавы няма долі. Меркавалася, што дзяржпрадстаўнікі змогуць прыпыняць выкананне рашэнняў агульнага сходу акцыянераў у выпадку, «калі рэалізацыя гэтых рашэнняў супярэчыць грамадскай карысці і бяспецы, наносіць урон навакольнаму асяроддзю, парушае правы і законныя інтарэсы іншых асоб».
Законапраект аб прыватызацыі ў першым чытанні быў прыняты ніжняй палатай беларускага парламента ў чэрвені 2013 года. Гэта выклікала шырокі рэзананс.
Прадстаўнікі бізнесу і міжнародных фінансавых арганізацый неаднаразова звярталіся ва ўрад, выказваючы заклапочанасць законапраектам, і прапаноўвалі не прымаць дакумент.
Так, члены кансультацыйнага савета па замежных інвестыцыях пры Савеце міністраў звярталіся да прэм'ер-міністра Беларусі і даказвалі, што прыняцце законапраекта адмоўна паўплывае на дзелавы клімат у краіне.
«Магчымасць накладання чыноўнікамі забароны на шэраг рашэнняў акцыянерных таварыстваў па сутнасці азначае вяртанне да сітуацыі, аналагічнай існаванню адмененага яшчэ ў 2008 годзе інстытута «залатой акцыі», — гаварылася ў лісце, які кансультацыйны савет накіраваў ва ўрад.
У 2014 годзе прадстаўнікі Дзяржкаммаёмасці заявілі, што ў сувязі з крытыкай з боку бізнес-супольнасці ў законапраект аб прыватызацыі плануецца ўнесці істотныя змены.
Цяпер чытаюць
Айцішніка з «Варгеймінга» судзілі па расстрэльным артыкуле. Падобна, за падтрымку Украіны — праўда, зрабіць ён нічога не паспеў1
Каментары