Улады падрыхтаваліся супрацьстаяць незалежным назіральнікам, якія фіксуюць парушэнні выбарчага заканадаўства. Аб гэтым заявіў адзін з каардынатараў кампаніі «Права выбару — 2015» Алесь Сілкоў 10 кастрычніка на прэс-канферэнцыі ў Мінску.
«На кожным участку, дзе сядзіць наш назіральнік, сядзяць два-тры прадстаўнікі іншых арганізацый. Да канца дня яны пішуць акт аб тым, што выбары прайшлі паспяхова і прыгожа, і здаюць яго старшыні камісіі», — сказаў ён.
Пры гэтым Сілкоў адзначыў, што, дзякуючы дзеянням праўладных назіральнікаў, можа быць пазбаўлены акрэдытацыі іншы назіральнік. Так, паведаміў ён, аднаго назіральніка кампаніі «Права выбару» пазбавілі акрэдытацыі на падставе акта іншых назіральнікаў, што «ён падбягаў да скрыні для галасавання, да стала, праводзіў апытанне насельніцтва».
Сілкоў нагадаў, што назіральнікі кампаніі «Права выбару» прапаноўвалі ўчастковым камісіям весці адкрыты падлік галасоў з дэманстрацыяй бюлетэняў усім назіральнікам. «Калі прыйшлі адказы, то ў нас стварылася ўражанне, што ўсе яны напісаныя ў адным цэнтры. У іх напісана, што дзякуюць за прапанову, але будуць лічыць згодна з законам. Але ж наша прапанова не разыходзіцца з законам», — адзначыў ён.
За 9 кастрычніка, у чацвёрты дзень датэрміновага галасавання, назіральнікі кампаніі падалі 42 скаргі на парушэнне выбарчага заканадаўства. Агульная колькасць пададзеных за чатыры дні скаргаў склала 319.
Падчас датэрміновага галасавання 1.344 назіральнікі кампаніі вядуць бесперапынны падлік выбаршчыкаў на 672 выбарчых участках. Паводле звестак назіральнікаў, за чатыры дні на ўчасткі прыйшло 216.888 чалавек, участковых камісій — 226.474. Разыходжанне з афіцыйнымі звесткамі склала 9.586 чалавек, ці 4,4%.
У Мінску агульная колькасць грамадзян, якія прыйшлі на 99 выбарчых участкаў, паводле звестак назіральнікаў, склала 32.067 чалавек, паводле звестак камісій — 34.749. Разыходжанне з афіцыйнымі звесткамі склала 2.682 чалавекі, ці 8,4%.
Каментары