За два дні датэрміновага галасавання на парламенцкіх выбарах на выбарчыя ўчасткі прыйшлі 9,63% выбарцаў, паведамляе ЦВК. Найбольшы працэнт у Віцебскай (10,94%) і Магілёўскай (10,88%) абласцях.
Найменш ахвотна датэрмінова галасуюць у Брэсцкай (7,68%) і Мінскай (8,57%). У Мінску на выбарчыя ўчасткі «прыйшлі» 9,65%.
У першы дзень датэрмінова прагаласавалі 3,92%.
Асноўны дзень выбараў — 11 верасня (нядзеля).
Варта зазначыць, што Аляксандр Лукашэнка 6 верасня параіў не гнаць людзей на датэрміновае галасаванне, сказаўшы таксама, што прыйдзе на выбарчы ўчастак разам з сынам Мікалаем у нядзелю.
А вось старшыня ЦВК Лідзія Ярмошына прагаласавала 7 верасня датэрмінова. «Ніякага прымусу студэнтаў ісці на выбары не было, а лішні выходны, які некаторым абяцалі, - гэта не прымус, а, калі можна так сказаць, подкуп выбаршчыкаў. Адміністрацыя ВНУ вольная такім чынам стымуляваць палітычную актыўнасць. Такім чынам, парушэнні заканадаўства няма», — сказала яна, заявіўшы, што гэтыя выбары на 100% празрыстыя з самага іх пачатку. Яна назвала іх самымі дэмакратычнымі з 2000 года.
У 2012 г., паводле афіцыйных звестак, датэрмінова прагаласавалі 26%.
Фота Радыё Свабода