«Звядзенне вялікага да ўбогасці»: цар Мікалай ІІ будзе праводзіць экскурсіі па Магілёве
«Магілёўаблтурыст» распрацаваў для гасцей абласнога цэнтра новы турыстычны маршрут «Шпацыр з Мікалаем ІІ па Магілёве».
Выбар гістарычнай асобы абумоўлены тым, што за часамі першай сусветнай вайны ў горадзе пэўны час знаходзілася стаўка Мікалая ІІ.
У ролі апошняга расійскага імператара выступае пераапрануты экскурсавод, які мусіць вадзіць турыстычныя групы, глядзець з імі ваенную хроніку тых гадоў ды іншае.
Разлік зроблены перадусім на расійскіх турыстаў — першая група на экскурсіі ўжо пабывала.
«Ідэя стварэння такога маршруту ўзнікла не выпадкова, — цытуе БелТА дырэктарку турыстычнага прадпрыемства Алену Карпенку. — У жыцці апошняга расійскага імператара горад адыграў фатальную ролю. Гэта першая апрабацыя тура з элементамі анімацыі і спроба ўбачыць горад Магілёў і яго гісторыю праз прызму ўспрымання цара і святога (імператар і яго сям'я кананізаваныя праваслаўнай царквой)».
Выбар гістарычнай асобы ўжо выклікаў здзіўленне ў колах гісторыкаў.
«Гэта звядзенне вялікай гісторыі горада да ўбогасці, — кажа «Нашай Ніве» доктар гістарычных навук Аляксандр Краўцэвіч. — Першая сусветная — гэта імперыялістычная вайна, развязаная ў тым ліку Расіяй, у тым ліку Мікалаем ІІ. Ад яе нічога добрага беларусы не мелі, а толькі гінулі. Няма тут чым хваліцца. І я б сказаў, што само нараджэнне такой ідэі — нават не русіфікацыя, а ўжо наступствы русіфікацыі мясцовага чынавенства».
Краўцэвіч кажа, што па Магілёве можна скласці дзясяткі найцікавейшых маршрутаў, якія б раскрывалі ўсю веліч гісторыі горада.
«Што казаць, калі ў гэтага горада была нават уласная архітэктурная школа ў XVII стагоддзі — магілёўскае барока, калі заходнееўрапейская культурная плыня прымала праваслаўную форму. Такога нідзе ў свеце не было! І гэта ж толькі адзін узор, які сведчыць пра ўнікальнасць месца», — сказаў Краўцэвіч.
Прыкладна такога меркавання прытрымліваецца і Алег Трусаў — кандыдат гістарычных навук і археолаг.
«Як гавораць расійскія навукоўцы, у Магілёве Мікалай ІІ прайграў лютаўскую рэвалюцыю, але для нашай краіны такая постаць няўдалая — усе гэтыя расстрэлы беларусаў, крывавая нядзеля… Гэта адмоўны персанаж, я супраць. Мне здаецца, гэта чарговая праява рускага свету. Атрымліваецца, рускія турысты будуць ехаць сюды, але замест мясцовай гісторыі і каларыту ім суюць тэзу, што Магілёў — гэта рускі горад. Вунь, маўляў, тут жа імператар жыў, амаль два гады была неафіцыйная сталіца, тут амаль Расія. Я гэта так бачу», — сказаў Трусаў і іранічна дадаў, што калі экскурсію вырашаць пакінуць, то для раўнавагі трэба пераапрануць іншага экскурсавода ў касцюм Левановіча.
[Язэп Пара-Левановіч — магілёўскі бургамістр, які ў 1661 годзе падняў горад на паўстанне супраць маскоўскіх акупантаў, у выніку чаго за адзін дзень гараджане забілі 7 тысяч стральцоў — за гэты ўчынак горад атрымаў сучасны герб ад Вялікага Князя Яна Казіміра — «НН»].
«У Магілёве процьма ўнікальных людзей: гэта і друкары, і мастакі. Пры гэтым шмат асоб, не звязаных з палітыкай. Вашчанка, Шміт, Бялыніцкі-Біруля — хай апранаюць простага мастака, ды той расказвае пра людзей, якія пакінулі значны ўнёсак у нашым і расійскім мастацтве», — падсумаваў Трусаў.
Сама ж дырэктарка «Магілёўаблтурыста» Алена Карпенка ў каментары «Нашай Ніве» сказала, што выбар асобы прадыктаваны перадусім прагматыкай.
«Летась толькі расійскія турысты прынеслі прыбытак у 40 тысяч даляраў — а гэта большая частка. Я зарыентавалася на расійскага турыста, выбіраючы асобу. Ім цікава тое, што звязана з Мікалаем Раманавым — ён у нас амаль два гады пражыў, ёсць што паказаць: і хроніка, і экспазіцыя ў музеі. Трэба, каб было займальна і цікава для турыстаў. Што да беларускіх турыстаў — то яны ездзяць асобна, не праз нас», — сказала дырэктарка.
«Але мы адкрытыя для прапаноў, — працягнула яна. — Каго вы нам прапануеце яшчэ пераадзець у касцюмы? Мы прыслухаемся і да гісторыкаў. Я буду радая ідэям — гэта ж самае дарагое ў нашай справе».
Алена Карпенка пакінула свой мэйл, на які ахвотныя могуць дасылаць свае ідэі турыстычных маршрутаў па Магілёве: [email protected]
Цяпер чытаюць
Просты беларус здзівіў людзей, калі ў Германіі прызнаваўся ў любові да Лукашэнкі. Але аказалася, што ён няпросты23
Каментары