Цікавы факт: у першым туры прэзідэнцкіх выбараў сярод французаў, што жывуць за мяжой, Марына Лё Пэн перамагла толькі ў адной краіне. І гэтая краіна — Беларусь.
У нашай краіне за Лё Пэн прагаласавалі 27,4% выбарцаў, тады як за Макрона — 22,6%.
Высокі вынік кандыдатка Нацыянальнага фронту атрымала таксама ў Туркменістане, але там яна апынулася на другім месцы пасля Макрона, і ў Джыбуці, дзе вялікую долю выбарцаў складаюць вайскоўцы з вайсковай базы. У Расіі Лё Пэн перамагла ў Екацярынбургу, але моцна адстала ў Маскве і Пецярбургу. Французы Мінска, такім чынам, галасавалі прыкладна так, як французы расійскай правінцыі.
Цяжка сказаць, ці тлумачыцца гэта ўплывам падкантрольных дыктатарам СМІ, якія малююць становішча ў Еўрасаюзе катастрафічным.
У той жа час агулам сярод французаў замежжа Лё Пэн зусім не папулярная. Яна атрымала на замежных участках усяго 6,5% галасоў проці 40,4% у Макрона.
Імаверна, большасць грамадзян Францыі ў Беларусі — гэта не патомныя французы, а былыя грамадзяне Беларусі, што атрымалі французскае грамадзянства, але ў сілу тых ці іншых прычын вярнуліся на жыхарства на бацькаўшчыну.
Усяго на консульскім участку Францыі ў Беларусі зарэгістравана 103 выбарцы. З іх галасавалі 62.
У Мінску, нагадаем, працуе пасольства Францыі, а ў Брэсце — консульства.
Як галасавалі французы замежжа ў другім туры, стане вядома заўтра.
Нагадаем, што на прэзідэнцкіх выбарах у Францыі з 66% галасоў перамагае ліберал Эманюэль Макрон. Масква ж на гэтых выбарах падтрымлівала Лё Пэн у разліку разваліць Еўрасаюз і НАТА знутры з дапамогай антыеўрапейскіх радыкалаў.
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары