У гэтым сезоне кіраўнік БАТЭ Анатоль Капскі не прысутнічаў ні на адным матчы каманды. А на гульні барысаўскага клуба супраць мінскага «Дынама» 20 мая заўзятары БАТЭ вывесілі банер у яго падтрымку: «Анатолич! С вами тысячи сердец!». Што ж здарылася?
Высветлілася, што ў вядомага футбольнага функцыянера зноў пачаліся праблемы са здароўем. Па інфармацыі «Нашай Нівы», Капскі прастыў яшчэ ў лютым, падчас збораў у Турцыі. Пасля пачалася пнеўманія з ускладненнямі, якая вельмі цяжка лячылася, бо Капскі раней меў вялікія праблемы з сэрцам. У 2013 годзе Анатоль Капскі таксама захварэў на пнеўманію. Пачаліся ўскладненні, у Вільні ён перанёс сур’ёзную аперацыю на сэрцы. Пасля аперацыі Капскі правёў тры дні ў коме — былі праблемы з ныркамі і печанню.
Сёлета, на шчасце, абыйшлося без падобных праблемаў і без аперацый. Але лячэнне і аднаўленне занялі працяглы час. Некаторы час Капскі правёў у бальніцы. Цяпер ужо ён знаходзіцца дома.
У клубе кажуць, што Капскі неўзабаве вернецца на працу.
«Анатоль Анатолевіч пэўны час адсутнічаў праз праблемы са здароўем, але ў найбліжэйшы час ён вернецца да працы ў клубе», — паведамілі «Нашай Ніве» у прэс-службе БАТЭ.
Праблемы са здароўем пераследавалі Капскага з самага дзяцінства. Адразу пасля нараджэння ён захварэў на запаленне лёгкіх, у пяцігадовым узросце зваліўся з прычэпа і раздрабіў тазасцегнавую костку. Пазней у 20-гадовага Капскага знайшлі рак. Ён прайшоў курс лячэння, але ў 1999 годзе хвароба вярнулася. Капскі лячыўся за мяжой.
Цяпер чытаюць
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1313
Каментары