У Беларусі з 4 па 30 кастрычніка 2019 года пройдзе перапіс насельніцтва, Белстат плануе задзейнічаць у гэтых мэтах банкаўскую сістэму АРІП, паведаміла ў эфіры «Беларусь-1» старшыня Нацыянальнага статыстычнага камітэта Іна Мядзведзева.
Паводле яе слоў, пробны перапіс пройдзе ўжо ў кастрычніку 2017 года ў Маладзечне — гэта генеральная рэпетыцыя перапісу 2019 года. Ад яе залежыць і тэхналогія, і колькасць, і якасць зададзеных пытанняў насельніцтву. Іна Мядзведзева патлумачыла, што выбар упаў на Маладзечанскі раён, таму што ён уяўляе сабой тыповы зрэз для Рэспублікі Беларусь.
«IT-тэхналогіі хутка развіваюцца, і мы сёння мяркуем правядзенне перапісу беспапяровага. Мы прапрацоўваем пытанні правядзення перапісу праз інтэрнэт. Мы вядзем працу з Нацбанкам па перапісе ў АРІП, таму што ў іх ёсць сістэма, якая працуе і мае ўсе ўзроўні абароны», — распавяла кіраўнік статыстычнага ведамства. Паводле яе слоў, можна адназначна казаць, што у 2019 годзе з'явіцца магчымасць анлайн запоўніць апытальнік перапісу.
Каментары