Стала вядомая дата выхаду абнаўлення Windows 10 з новым дызайнам
Microsoft паведаміла, што выпусціць наступнае буйное абнаўленне для Windows 10 пад назвай Fall Creators Update 17 кастрычніка. Кампанія тэставала яго на працягу амаль усяго апошняга года.
Галоўнай «фішкай» стане новы карыстальніцкі інтэрфейс аперацыйнай сістэмы — Fluent Design. Абнаўленне, у прыватнасці, зробіць дызайн убудаваных дадаткаў больш вытанчаным.
Адна з навінак — функцыя хуткага выбару эмодзі, якая актывуецца спалучэннем клавіш «Win+.» або «Win+;». Таксама Microsoft дадасць бэта-версію праграмнага забеспячэння для адсочвання рухаў вачэй і шэраг буйных паляпшэнняў у плане працы стылуса.
Кампанія значна ўдасканаліць стандартны дадатак Photos, дазволіўшы ствараць праз яго гісторыі на манер Instagram — з малюнкамі, відэаролікамі, музыкай і трохмернымі аб'ектамі. Таксама Microsoft палепшыць гульнявы рэжым і дадасць новыя элементы абароны ад вірусаў і уразлівасцяў у Windows Defender.
У Windows 10 з выхадам восеньскага абнаўлення з'явіцца функцыя People, якая дазволіць замацоўваць любімыя кантакты на панэлі задач. Таксама Microsoft дадасць магчымасць OneDrive Files On-Demand, з якой карыстальнікам не трэба будзе пастаянна сінхранізаваць файлы з фірмовага воблачнага сховішча кампаніі або цалкам загружаць папкі: усе элементы будуць бачныя першапачаткова, а патрэбны кантэнт можна будзе спампаваць.
Каментары