21 кастрычніка ўрад Іспаніі абвясціў, што мае намер выканаць арт. 155 Канстытуцыі. Ён дэкларуе, што, калі адзін з рэгіёнаў не выконвае свае абавязацельствы перад дзяржавай альбо шкодзіць нацыянальным інтарэсам Іспаніі, урад ухвалення сената мае права прымяніць любыя меры ў рамках закона, каб выправіць сітуацыю, піша РБК.
Галасаванне ў сенаце па каталонскім пытанні прызначана на 27 кастрычніка. Мадрыд перакананы, што зараз мае месца парушэнне абодвух палажэнняў артыкула — невыкананне абавязацельстваў і шкоду дзяржаўным інтарэсам.
Але да пасяджэння сената парламент Каталоніі правядзе экстранную сесію, дзе абмяркуе свой адказ на дзеянні Мадрыда. У сваёй калонцы на The Independent генеральны сакратар каталонскай Рады па публічнай дыпламатыі Альберт Роё-Марыне паабяцаў, што сесія стане «гістарычнай».
А па дадзеных іспанскай газеты La Razon, на сесіі, якая адбудзецца 27 кастрычніка, Карлес Пучдэмон і яго паплечнікі абвесцяць пра незалежнасць Каталоніі.
Ва ўрада Каталоніі ёсць два асноўныя варыянты адказу Мадрыду. Альбо рэгіянальны парламент канчаткова прымае дэкларацыю аб незалежнасці, альбо Пучдэмон апярэдзіць Мадрыд і сам распусціць рэгіянальны парламент. У любым выпадку на выпрацоўку адказу ў Барселоны ўсяго чатыры дні.
Раней крыніцы Bloomberg сцвярджалі, што ўжо ў панядзелак, 23 кастрычніка, парламент Каталоніі будзе абмяркоўваць тэхнічныя пытанні абвяшчэння незалежнасці.
***
1 кастрычніка на рэферэндуме ў Каталоніі 90% выбаршчыкаў пры яўцы ў 43% (2,28 млн з 5,31 млн выбаршчыкаў) выказаліся за аддзяленне ад Іспаніі. Мадрыд палічыў правядзенне рэферэндуму незаконным. У сваю чаргу Пучдэмон заявіў, што Каталонія атрымала права на незалежнасць, але спачатку прапануе Мадрыду перамовы. Рахой у адказ запатрабаваў ад Пучдэмона растлумачыць, абвясціла аўтаномія незалежнасць ці не. Не дачакаўшыся ад Барселоны выразнага адказу, урад Іспаніі і накіраваў на зацвярджэнне меры ў кантэксце прымянення арт. 155 Канстытуцыі.
Каментары