Міліцыя пра гродзенца з ампутаванай часткай нагі: У яго было 2 праміле, прэтэнзій не мае
Прэс-служба МУС пракаментавала ў тэлеграме сітуацыю з гродзенцам Дзянісам Лук'янавым.
Нагадаем, што сястра Дзяніса сцвярджае, што той быў збіты амапаўцамі. Праз некалькі дзён мужчына трапіў у рэанімацыю, дзе яму была ампутавана частка ягадзіцы.
Як зазначае прэс-служба міліцыі, на аўтафестывалі 20 ліпеня Лук'янаў быў п'яны і парушаў грамадскі парадак. Спачатку дзяжурны нарад даставіў яго для разбору, а ў 18.00 яго адвезлі ў Гродзенскі РАУС (дзе таксама размешчаны і медвыцвярэзнік).
Міліцыя падкрэслівае, што супрацоўнікі АМАП УУС Гродзенскага аблвыканкама да дастаўлення мужчыны ў аддзел міліцыі дачынення не мелі, бо прыбылі на аўтафестываль толькі ў 19:30.
Пасля складання адміністрацыйнага пратаколу (зафіксавана 2 праміле алкаголю ў выдыханым паветры) мужчына быў накіраваны ў медвыцвярэзнік. Там яго агледзеў доктар і ніякіх цялесных пашкоджанняў не выявіў. Больш за тое, сам малады чалавек на здароўе не скардзіўся, рухаўся актыўна, што пацвярджаюць запісы з камер відэаназірання. Раніцай пасля поўнага ацверазення і без скаргаў на здароўе мужчына быў выпісаны з установы.
У гэты ж дзень ён зноў прыбыў у РАУС для аплаты паслуг медвыцвярэзніка. Як бачна па відэазапісе, прыкмет праблем са здароўем не меў.
Ніякіх заяў і скаргаў ні з боку мужчыны, ні яго сваякоў, у органы ўнутраных спраў не паступала. У далейшым па ініцыятыве супрацоўнікаў упраўлення па Гродзенскай вобласці ГУУБ МУС адбылася размова з Лук'янавым. Ён растлумачыў, што супрацоўнікамі міліцыі да яго гвалту не ўжывалася, а траўмы, з якімі апынуўся ў шпіталі, ён атрымаў па ўласнай неасцярожнасці праз 11 дзён пасля аўтафестываля па прычыне знаходжання ў стане алкагольнага ап'янення.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага38
Каментары