Палітыкі неадназначна ўспрымаюць факт уключэння Беларусі ў праграму «Усходняе партнёрства».
Беларускія палітыкі неадназначна ўспрымаюць факт уключэння Беларусі ў праграму «Усходняе партнёрства».
Як раней паведамлялася, рашэнне пра гэта было прынята 23 лютага ў Бруселі кіраўнікамі ўсіх 27 краін — членаў ЕС.
Лідэр Аб’яднанай грамадзянскай партыі (АГП) Анатоль Лябедзька
лічыць факт уключэння краіны ў праграму «Усходняе партнёрства» «падзеяй пазітыўнай».«Арыентацыя на дыялог Еўропы з Беларуссю падзея таксама пазітыўная.
Але я катэгарычна не магу прыняць тое, як гэты дыялог рэалізуецца на практыцы», — заявіў А.Лябедзька.
«Па‑першае, гэта дыялог без пасрэднікаў, што публічна агучыў Аляксандр Лукашэнка. Гэта значыць, што з дыялогу выключаецца вялікая колькасць грамадзян Беларусі, якія раней імкнуліся да еўраінтэграцыі. Па‑другое, у Еўропы адсутнічае выразны план узаемаадносін з Беларуссю, што пацвердзіў візіт у Беларусь Хаўера Саланы. Па‑трэцяе, апошнія падзеі ў Беларусі ніяк не стыкуюцца з праграмай «Усходняе партнёрства». Мы вярнуліся да «нулявой адзнакі» — у Беларусі разганяюцца мірныя акцыі, з’явіліся новыя палітвязні. Я баюся, што ў такой сітуацыі ўключэнне нашай краіны ў гэтую праграму выкліча масавае расчараванне менавіта па‑праеўрапейску настроенага насельніцтва Беларусі. Нельга казаць аб тым, што ўчора Беларусь была «апошняй дыктатурай у Еўропе», а сёння ўключаць яе ў еўрапейскія праграмы без якаснага паляпшэння сітуацыі ў Беларусі», — заявіў А.Лябедзька.
Лідэр Партыі БНФ Лявон Баршчэўскі зазначыў, што яго партыя заўсёды падтрымлівала ідэю партнёрства з Еўропай. «Аднак у тых адносінах, што склаліся паміж уладамі Беларусі, палітычнымі партыямі і грамадзянскай супольнасцю, гэта рашэнне неапраўданае і дачаснае. Калі ў Беларусі арыштоўваюць людзей нават за ўдзел у мерапрыемствах, прысвечаных дню роднай мовы, дык пра якія адносіны з Еўропай можа ісці гаворка», — здзіўляецца Л.Баршчэўскі.
Лідэр Беларускай сацыял‑дэмакратычнай партыі (Грамада) Анатоль Ляўковіч лічыць, што «вялікае пытанне ў тым, якімі будуць месца і роля дэмакратычных сіл у гэтай праграме». «Еўрапейцы кажуць, што афіцыйны Мінск зрабіў крокі ў паляпшэнні сітуацыі ў краіне. Напрыклад, вызваліў палітвязняў, і ў першую чаргу экс‑кандыдата ў прэзідэнты Аляксандра Казуліна. Будзем спадзявацца, што гэты працэс не завершаны», — сказаў А.Ляўковіч.
Экс‑кандыдат у прэзідэнты, лідэр руху «За Свабоду» Аляксандр Мілінкевіч лічыць уключэнне Беларусі ў праграму «Усходняе партнёрства» «гістарычным рашэннем».
«Гэта падзея велізарнай важнасці. Гэта пацвярджае цывілізацыйны выбар Беларусі — быць у Еўропе.І Еўропа лічыць гэтак жа. Еўропа ўключыла ў праграму Усходняга партнёрства не ўладу, не апазіцыю, а народ Беларусі», — сказаў А.Мілінкевіч.
Паводле яго меркавання, у сувязі з уключэннем у ініцыятыву «Усходняе партнёрства» беларускія ўлады вымушаны будуць праводзіць дэмакратычныя змены ў краіне. «Дэмакратызацыя — гэта не раптоўнае рашэнне, гэта працэс. І я думаю, што ў сувязі з уключэннем Беларусі ў гэтую праграму працэс дэмакратызацыі не толькі будзе працягнуты, ён будзе больш інтэнсіўным», — лічыць А.Мілінкевіч.
Каментары