У Брытаніі памёр Роберт Уэйтан — самы стары мужчына ў свеце. Яму было 112 гадоў
У Брытаніі памёр Роберт Уэйтан — самы стары мужчына ў свеце. У сакавіку ён адсвяткаваў свой 112-ы дзень нараджэння, піша Бі-бі-сі.
У лютым Уэйтан стаў самым старым мужчынам пасля смерці японца Цітэцу Ватанабэ, якому таксама было 112 гадоў.
У заяве сям'і Уэйтана сказана, што ён быў «незвычайным чалавекам», які «мірна памёр у сне ад раку». Гэта адбылося ў чацвер раніцай.
«На ўсіх ён глядзеў як на сваіх братоў ці сясцёр і верыў у тое, што трэба берагчы адно аднаго і ставіцца да ўсіх з любоўю і разуменнем. У яго было вельмі шмат сяброў, ён чытаў і гаварыў пра палітыку, тэалогію, экалогію і многае іншае да самай смерці», — піша сям'я Уэйтана.
Роберт нарадзіўся 29 сакавіка 1908 года ў горадзе Хал.
На працягу жыцця брытанец працаваў інжынерам, яму прыходзілася бываць у працяглых камандзіроўках у Тайвані, Японіі і Канадзе.
У інтэрв'ю Бі-бі-сі ён казаў, што сакрэт яго даўгалецця — «імкнуцца не паміраць».
Цяпер самы стары чалавек у свеце — японка Канэ Танака, ёй 117 гадоў.
Каментары