Вядомая беларуская баскетбалістка Алена Леўчанка паспяхова правяла свой першы матч за два гады, піша Tut.by.
У канцы студзеня Леўчанка падпісала кантракт з адным з найлепшых клубаў Грэцыі — афінскім «Панацінаікасам».
Аднаўленне перарванага яшчэ ў мінулым годзе чэмпіянату зацягвалася з-за каранавіруса, але сёння «Панацінаікас» зноў выйшаў на пляцоўку. І каманда атрымала ўпэўненую перамогу над «Эсперыдэс Каліатэас» - 64:46.
Важкі ўклад у перамогу ўнесла і Леўчанка. Беларуская цэнтравая выйшла ў стартавай пяцёрцы і правяла на пляцоўцы больш за 27 хвілін. За гэты час яна набрала 13 ачкоў і зрабіла 8 падбораў.
Пасля чатырох тураў у «Панацінаікаса» тры перамогі, што дазваляе камандзе размяшчацца ў верхняй частцы турнірнай табліцы.
Адзначым, што Алена Леўчанка выйшла на пляцоўку пад нумарам 20. Свой выбар баскетбалістка патлумачыла наступным чынам.
«У 2020 годзе мы сталі нацыяй і аб'ядналіся, у 2020 годзе народ Беларусі стаў на абарону праўды і сваіх правоў! У знак салідарнасці з маім беларускім народам і з усімі зняволенымі, якія цяпер знаходзяцца ў турмах, з тымі, хто працягвае змагацца за свабоду — я з вамі, а вы са мной», — напісала Леўчанка на сваёй старонцы ў Instagram.
Алена Леўчанка — адна з найлепшых баскетбалістак у гісторыі Беларусі. Яна выступала за зборную з 2001 года, двойчы гуляючы ў складзе нацыянальнай каманды на Алімпійскіх гульнях. У 2010 годзе згуляла ў фінале жаночай НБА і была прызнана найлепшай цэнтравой чэмпіянату свету.
Зараз Леўчанка падтрымлівае рух спартсменаў супраць гвалту і фальсіфікацый на выбарах. У кастрычніку яна адседзела 15 сутак на Акрэсціна.
Цяпер чытаюць
«Сіл няма, рэсурсаў няма, усе стаміліся». Лукашэнка заявіў, што вайна ва Украіне ў найбліжэйшыя месяцы будзе скончаная9
Каментары