Прыйшлі навіны з-за кратаў ад Аляксандра Фядуты. Мяркуючы па ўсім, настрой у вядомага журналіста, палітолага і філолага бадзёры, піша «Народная воля».
Калі хтосьці са шкадаваннем ловіць апошнія тыдні лета, дык Аляксандр Іосіфавіч ставіцца да гэтага зусім па-іншаму:
«Вось пра што я дакладна не шкадую, дык гэта пра цяперашняе лета. Яно далося мне вельмі цяжка. Гарачыня была амаль невыносная. 28 чэрвеня, напрыклад, у самы разгар спёкі, нават пачаў губляць прытомнасць… Зараз, дзякуй Богу, мне лягчэй».
Фядута імкнецца падтрымліваць сябе ў тонусе і не губляе пачуццё гумару: «Падчас шпацыраў па нашым бетонным дворыку ўмудраюся рабіць нейкія фізічныя практыкаванні, дэманструючы чайкам, якія пралятаюць над галовамі з дзікім рогатам, што я ўсё яшчэ ў форме».
Нягледзячы на змрочныя абставіны, вядомы філолаг выношвае пэўныя творчыя планы — абдумвае кнігу аб падзеях, якія адбываліся ў Паўночна-Заходнім краі Расійскай імперыі пасля паразы паўстання 1863 года, грунтуючыся на ўспамінах аднаго з чыноўнікаў канцылярыі генерал-губернатара Мураўёва.
«У сукупнасці атрымаецца цудоўная кніга, значная частка якой будзе апублікавана ўпершыню», — упэўнены Фядута.
Аляксандр Фядута быў арыштаваны 12 красавіка ў Маскве. Ён разам з Рыгорам Кастусёвым, юрыстам з ЗША Юрыем Зянковічам, Ігарам Макарам і некалькімі іншымі асобамі стаў фігурантам крымінальнай справы аб «змове з мэтай захопу ўлады неканстытуцыйным шляхам».
Каментары