У Швейцарыі пабудуюць драўляны хмарачос — самы высокі драўляны жылы дом у свеце ФОТА
Драўляныя хмарачосы — новы трэнд, які цяпер ужо перайшоў і на сферу жылых дамоў. Доказ — унікальны праект, які зусім хутка пачнуць рэалізоўваць у швейцарскім горадзе Вінтэртур, што знаходзіцца недалёка ад Цюрыха.
Комплекс пад назвай Rocket & Tigerli, які пабудуюць у Вінтэртуры, будзе складацца з чатырох будынкаў, прычым вышыня аднаго з іх складзе сто метраў, піша CNN.
Дрэва стане не адзіным матэрыялам, які выкарыстаюць для будаўніцтва — напрыклад, фасад комплексу будзе пакрыты цёмна-чырвонымі і жоўтымі тэракотавымі цаглінамі з шэра-зялёнымі дэталямі. Гэта дапаможа ўпісаць будынак у навакольную прастору, каб ён лепш спалучаўся з чырвонымі дахамі і жоўтай цэглай будынкаў па суседстве.
Акрамя жылых памяшканняў, у новых будынках плануюць размясціць гандлёвыя кропкі, бар і гатэль. Архітэктары паспрабавалі зрабіць дамы як мага больш сучаснымі па стылі і прадугледзелі вялікія вокны, якія забяспечаць у памяшканнях максімум сонечнага святла. Стваральнікі комплексу называюць яго вялікім праектам, які значна паўплывае на жыццё ў раёне як у сацыяльным, так і ў эстэтычным плане.
Меркавана, першых жыхароў комплекс прыме ў 2026 годзе.
Дацкая кампанія Schmidt Hammer Lassen Architects, якая спраектавала дамы, называе канструкцыю комплексу інавацыйнай і разглядае яе як адзін з прыкладаў таго, як дрэва можа быць выкарыстанае ў якасці альтэрнатывы бетоннаму каркасу будынка. Гэта дазволіць зрабіць пабудову высокіх дамоў больш экалагічнай.
Чытайце таксама:
Пантэон і Калізей у Рыме стаяць непарушна 2000 год. Чаму сучасныя будаўнікі маглі б павучыцца ў старажытных рымлян
У Італіі надрукавалі на 3D-прынтары гліняны дом
Цяпер чытаюць
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай2
Каментары