Міністр абароны Украіны назваў тры магчымыя сцэнарыі заканчэння вайны
Міністр абароны Украіны Аляксей Рэзнікаў на арганізаванай выданнем Forbes Ukraine канферэнцыі «Будуем разам» 8 ліпеня падзяліўся сваім бачаннем, як будзе развівацца далей сітуацыя на ваенных франтах. Паводле яго, ёсць тры магчымыя сцэнарыі заканчэння вайны — два больш хуткія, а адзін працяглы.
«Першы сцэнарый будзе прыблізна такі ж, як і «good will», «добрая воля» расіян, якая была імі абвешчаная, калі яны беглі з Кіеўшчыны, Чарнігаўшчыны, Сумшчыны і вострава Змяіны. Адпаведна, я думаю, што ён будзе разбіты на некалькі ланцужкоў.
Спачатку мы выйдзем з вамі на пазіцыі да 24 лютага бягучага года, далей будуць нейкія размовы па статусе акупаваных раней Данецка, Луганска і Крыма, але за сталом з нашымі магутнымі партнёрамі», — сказаў Рэзнікаў.
Ён падкрэсліў, што «Мінска-3 дакладна не будзе, нейкіх капітуляцыйных дамоўленасцяў не будзе, і з пісталетам ля скроні ніхто весці перамовы не будзе».
«Варыянт другі — паступова мы будзем перамолваць Узброеныя сілы РФ, таму што гэта на самай справе вайна рэсурсу на рэсурс. У іх больш людзей, тэрыторыі, танкаў, самалётаў і г. д., але ўсё не сучаснае, усё даўняе, і яны сёння выкарыстоўваюць прынцып мясарубкі», — адзначыў Рэзнікаў.
Міністр мяркуе, што другі варыянт перамогі не настолькі хуткі — да канца гэтага года, магчыма, з захопам пачатку новага года.
«Трэці — больш драматычны для Расіі, гэта развал Расійскай Федэрацыі, парад суверэнітэтаў на некалькі розных суб'ектаў: Татарстан, Башкартастан, на ўсходзе і г. д. Мы гэта з вамі дакладна пры нашым жыцці ўбачым, але гэта крыху працяглая гісторыя», — расказаў Рэзнікаў.
Бяляцкі: Не трэба спяшацца адмяняць санкцыі. Бо гэта будзе ўспрынята рэжымам як яго перамога і слабасць Еўропы15
Каментары