Затрымалі за вывешванне нацыянальных сцягоў Беларусі і Украіны, але судзіць будуць за «экстрэмізм»
У сярэдзіне верасня сілавікі затрымалі пяць мінчукоў за тое, што яны вывесілі вялікія нацыянальныя сцягі Беларусі і Украіны на фасадзе дома па вуліцы Лесі Украінкі ў Мінску.
Супраць іх завялі крымінальную справу за «злоснае хуліганства, здзейсненае групай асоб», паводле ч. 2 арт. 339 Крымінальнага кодэкса і змясцілі ўсіх пад варту ў жодзінскую турму, паведамляе «Вясна».
Гэта Дзяніс Варозаў, Вячаслаў Панцюшэнка, Вольга Церах, Уладзімір Лавор і Кацярына Зарэцкая. Але пераслед затрыманых на гэтым не спыніўся.
Праз два тыдні пасля іх затрымання Міністэрства ўнутраных спраў прызнала «экстрэмісцкім фармаваннем» канал у дадатку Zello, праз які камунікавалі мінчукі падчас арганізацыі акцыі.
Следства па справе скончана. Сярод інкрымінуемых артыкулаў няма «злоснага хуліганства», на падставе якога затрымалі і змясцілі пад варту палітвязняў. Цяпер пяць чалавек абвінавачваецца па больш цяжкіх артыкулах Крымінальнага кодэкса: ч. 1, 3 арт. 361—1 (стварэнне і ўдзел у «экстрэмісцкім фармаванні») і ч. 2 арт. 361—4 КК (садзейнічанне экстрэмісцкай дзейнасці). Ім пагражае да 7 гадоў калоніі.
«Калі няма за што «пасадзіць» любога чалавека, то можна выбраць з наяўных або стварыць для яго «экстрэмісцкае фармаванне». Таму што, вядома, вывешванне сцягоў — гэта дакладна не хуліганства ў гэтым кантэксце, а пакараць за праяву грамадзянскай пазіцыі вельмі хацелася», — пракаментаваў праваабаронца Павел Сапелка.
Падтрымаць палітвязняў можна лістамі, грашовымі пераводамі, пасылкамі па адрасе: Следчая турма № 8, 222163, г. Жодзіна, вул. Савецкая, 22А.
Каментары