У Паветраных сілах расказалі, колькі F-16 трэба Украіне для перавагі над ворагам
Для перавагі над ворагам у паветры на канкрэтным напрамку Украіне неабходна па меншай меры 3-4 эскадрыллі самалётаў F-16 па 12-16 адзінак. Пра гэта паведаміў начальнік авіяцыі камандавання Паветраных сіл УСУ Сяргей Галубцоў у інтэрв'ю праекту «Данбас Рэаліі».
«Калі мы разумеем, што супраць нас групоўка, скажам так, 50 эскадрылляў, і 39 аэрадромаў, з якіх яны выконваюць задачы, вядома, нам хацелася б больш. Але калі гэта будзе хаця б 3-4 эскадрыллі, я думаю, што на асобным напрамку мы зможам заваяваць перавагу ў паветры і прымусіць ворага наогул адмовіцца ад тых удараў, якія яны цяпер наносяць на пэўным участку, на пэўнай паласе абароны», — сказаў Галубцоў
Пры гэтым ён адзначыў, што «для таго, каб спланаваць аперацыю па знішчэнні або нанясенні ўдараў… варта казаць хаця б пра эскадрыллю, хаця б пра 12-16 самалётаў».
У той жа час брыгадны генерал заявіў, што
«перавагі як такой, тактычнай або аператыўнай, вораг у паветры не мае дзякуючы таму, што Украіна атрымала ад краін-партнёраў дастаткова магутную дапамогу: радыёлакацыйныя станцыі выяўлення, назірання, зенітныя ракетныя комплексы, і ўсе бачаць на практыцы, як гэтыя комплексы працуюць і які працэнт паражэння цэляў».
Аднак на ўзбраенні ў расійскай авіяцыі цяпер знаходзяцца самалёты Су-35 і МіГ-31БМ, якія здольныя прымяняць ракеты павышанай далёкасці і вялікай далёкасці, а ва Украіне пакуль такой магчымасці няма.
Адказваючы на пытанне, наколькі складана будзе схаваць самалёты F-16 на тэрыторыі Украіны, каб расійскія ракеты і дроны не дасталі, прадстаўнік камандавання Паветраных сіл сказаў: «Проста схаваць самалёты не атрымаецца. Я думаю, што тут трэба будзе шукаць комплексны падыход, маскіраваць і разгрупоўваць, перамяшчаць з аэрадрома на аэрадром. І другі кірунак — усё ж трэба будзе выкарыстоўваць частку зенітных ракетных комплексаў для прыкрыцця гэтых аэрадромаў».
Раней Мінабароны Украіны заяўляла, што для вызвалення Украіны ад расійскіх акупантаў неабходна 48 знішчальнікаў F-16.
Прэм'ер-міністры Вялікабрытаніі і Нідэрландаў па выніках сустрэчы на палях саміту Рады Еўропы ў Рэйк'явіку дамовіліся садзейнічаць стварэнню міжнароднай кааліцыі па ўзмацненні супрацьпаветранай абароны Украіны.
Па даных медыя, у Еўропе не выключаюць, што Украіне могуць перадаць знішчальнікі F-16 ужо ўвосень гэтага года.
Каментары