З 10 па 14 лютага пройдзе ХVІІ Мінская міжнародная кніжная выстава-кірмаш. Нягледзячы на крызіс, на ёй чакаецца каля 600 удзельнікаў з 25 краін.
З 10 па 14 лютага пройдзе ХVІІ Мінская міжнародная кніжная выстава-кірмаш. Нягледзячы на крызіс, на ёй чакаецца каля 600 удзельнікаў з 25 краін.
Ганаровым госцем сёлета будзе Францыя. Гэта першая краіна з Заходняй Еўропы, якая атрымала такі статус. Да гэтага ім ганараваліся Казахстан, Ізраіль і Расія.
Падчас выставы запланавана правядзенне некалькіх буйных прэзентацый з удзелам замежных пісьменнікаў. Але арганізатары не спяшаюцца раскрываць іх прозвішчы.
Вядома пакуль, што прыедзе расійскі літаратар Міхаіл Велер.
11 лютага адбудзецца міжнародны круглы стол, прысвечаны стасункам паміж беларускімі і замежнымі пісьменнікамі. Удзел у ім возьмуць прадстаўнікі з Латвіі, Літвы, Расіі, Таджыкістана, Францыі. У межах круглага стала будуць прэзентаваны пераклады на таджыкскую мову кніг беларускіх аўтараў Міколы Мятліцкага, Юрыя Сапажкова і Сяргея Трахімёнка.
Падобная выстава-кірмаш адметная тым, што ў беларускай сталіцы збіраюцца не толькі айчынныя выдаўцы, але і замежныя. І калі, да прыкладу, у Беларусі літаратура па-ўкраінску не выходзіць, а патрэба такая ёсць, то можна набыць яе непасрэдна ва ўкраінскіх выдаўцоў. Акрамя гэтага, тут кнігі прадаюцца без гандлёвай накруткі.
А дырэктар «Белкнігі» Юрый Хмыроў паабяцаў, што на выданне, якога не будзе ў продажы на кірмашы, можна будзе пакінуць замову.
І яе задаволяць.
Ганаровым госцем на наступнай выставе ў Мінску будзе Германія. Пакуль гэтая краіна вырашае, якім чынам сябе прадставіць, арганізатараў турбуе іншая праблема. Яны задаюцца пытаннем: «Дзе пройдзе ХVІІІ Мінская міжнародная выстава-кірмаш?». Бо ў выставачным комплексе «БелЭКСПА» (вул. Янкі Купалы, 27) выдаўцы збяруцца апошні раз. Ужо сёлета будынак плануюць знесці, а на яго месцы ўзвядуць гатэль.
Цяпер чытаюць
Мсціслаў Мекта: яшчэ адзін рэцыдывіст рвецца ва ўладу, прыкінуўшыся спецназаўцам-ябацькам20
Каментары