Качка, сіроп, бліны — рэцэпты страў з журавінамі

Сіроп з журавінаў

Спатрэбіцца:

• 250 г свежых журавін
• 2 шклянкі (500 мл) вады
• прыкладна ½ шклянкі (80-100 г) цукру (лепш — карычневага) або мёду (дадавайце мёд у астылы сіроп, каб мёд не страціў сваіх уласцівасцяў)
• 3 сталовыя лыжкі лімоннага соку

Як рабіць:

1. Старанна прамыйце журавіны і пакладзіце ў каструлю.
2. Затым заліце ягады вадой, дадайце цукар і лімонны сок, давядзіце да кіпення і варыце накрытымі каля 7-10 хвілін, пакуль журавіны не разварацца.
3. Нарэшце працадзіце ўсё скрозь сіта і пераліце ў стэрылізаваную бутэльку/слоік.
4. Гатовы сіроп захоўвайце ў халадзільніку. Яго лепш выкарыстаць на працягу тыдня, але можна і пастэрызаваць.

Адзін з варыянтаў, як дадаваць у гарбату:

250 мл свежазаваранай чорнай гарбаты, 2-3 сталовыя лыжкі журавінавага сіропу, 1 палачка карыцы, 1 зорачка анісу. І атрымлівайце асалоду!

Качыныя ножкі ў журавінным соусе

Мяса качкі можа быць цвердаватым, але калі яго папярэдне замарынаваць, то качка становіцца мяккай і смачнай. Пастаўце мяса марынавацца з раніцы — і ўвечары можаце гатаваць на вячэру.

Спатрэбіцца:

• 4 качыныя ножкі
• 100 мл алею
• 200 мл сухога белага віна
• чабор (некалькі галінак)
• лаўровае лісце (2-3)
• перац, размарын, гваздзік

Соус:

• 1/2 кг яблыкаў
• 1 шклянка журавін (свежых ці замарожаных)
• 200 мл вады
• 2 сталовыя лыжкі лімоннага соку
• соль, перац

Як гатаваць:

1. Змяшайце алей, віно і спецыі. Качыныя ножкі вымыйце, абсушыце і натрыце аліўкавым марынадам. Не саліце.
2. Адпраўце ножкі ў халадзільнік марынавацца на 8-10 гадзін. Прамарынавае качынае мяса пасаліце, пакладзіце ў пакет для запякання, заліце марынадам і запякайце ў духоўцы гадзіну-паўтары пры тэмпературы 180 градусаў. Адкрыйце пакет і выдаліце тлушч і марынад.
3. Запякайце качку яшчэ некалькі хвілін, пакуль не ўтворыцца апетытная залацістая скарынка. Пакуль качка запякаецца, прыгатуйце соус.
4. З яблыкаў выражце сярэдзіну і нарэжце іх кавалачкамі. Пакладзіце яблыкі і журавіны ў рондаль, заліце вадой, дадайце соль, перац і лімонны сок.
5. Давядзіце да кіпення, паменшыце агонь і варыце, пакуль яблыкі і журавіны не стануць мяккія (каля 20 хвілін). Сумесь здрабніце блэндарам да аднастайнасці.
6. Падавайце качку з падліўкай. Упрыгожце зелянінай. Гэтае мяса добра спалучаецца з гароднінай або рысам.

Бліны з журавінамі і крэмам маскарпонэ

На бліны:

• 1 шклянка пшанічнай мукі
• 1 шклянка малака
• 3/4 шклянкі вады (напрыклад, газаванай)
• 2 вялікія яйкі
• дробка солі
• 3 сталовыя лыжкі алею або топленага масла

У міску насыпце муку, дадайце малако і ваду (газаваную ці звычайную) і перамяшайце венчыкам або міксерам (нядоўга) да атрымання аднастайнага цеста без камякоў.

Дадайце яйкі, соль і алей або топленае масла і яшчэ раз нядоўга перамяшайце венчыкам — да аднароднай масы.

Разагрэйце патэльню і з дапамогай апалоніка выліце на яе невялікую порцыю цеста. Паварочваючы патэльню, размяркуйце яго па ўсёй паверхні патэльні.

Калі ніжняя частка бліна падпячэцца і добра застыне, перавярніце яго лапаткай і абсмажвайце з іншага боку.

 На журавіны:

• 1 шклянка журавін (свежых або замарожаных) 100 г
• 2 сталовыя лыжкі трысняговага цукру
• 4 сталовыя лыжкі журавінавага або малінавага соку

У невялікую каструлю з вадой высыпце прамытыя журавіны, дадайце цукар, накрыйце і давядзіце да кіпення. Варыце на павольным агні каля 2 хвілін, пакуль большая частка журавін не трэсне.

Дадайце сок і варыце яшчэ 1—2 хвіліны. Прыміце з агню, пры неабходнасці дадайце больш цукру.

 На крэм з маскарпонэ:

• 3 яечныя жаўткі
• 5 сталовых лыжак цукровай пудры
• 200 г сыру маскарпонэ
• 200 мл вяршкоў 30%
• 1 сталовая лыжка лімоннага соку

 Як усё аб’яднаць:

Падсмажце бліны і зварыце журавіны. Прыгатуйце крэм: жаўткі ўзбіце з цукровай пудрай дабяла, дадайце сыр маскарпонэ і ўсё перамяшайце. Нарэшце, дадайце ўзбітыя густыя вяршкі і лімонны сок і акуратна перамяшайце ўсё лыжкай. Крэм захоўваеце ў халадзільніку, пакуль не будзеце выкладваць яго на бліны.

На кожны блін намажце прыкладна 2-3 сталовыя лыжкі крэму і 1 сталовую лыжку журавіннага соусу, складзіце блінцы трохкутнікамі і падавайце.

• 0
• 0
• 0
• 0
• 0
• 0
• 0
• 0