«Даляраў столькі, што хоць печку імі палі». Азаронак на камеру спаліў купюру ў 1 даляр
Прапагандыст заявіў, што рост курсу яго не хвалюе.
Прапагандыст СТБ Рыгор Азаронак на фоне падзення беларускага рубля вырашыў рытуальна спаліць даляр.
На відэа, якое Азаронак апублікаваў у тэлеграм-канале, відаць, як ён падпальвае купюру наміналам 1 даляр.
«Які ўжо дзень нашыя і расійскія збеглыя спрабуюць развесці паніку наконт даляра, курсу, ашчаджэнняў, валюты. Ім мрояцца пенсіянеркі, якія б'юцца за зялёныя фанцікі, і баі за апошні пачак грэчкі на касах.
Схадзіў у абменнік. Ніякай чаргі. Ніякіх натоўпаў. Даляраў заваліся. Настолькі, што хоць печку імі палі, спальвай хоць да Белых ночаў. Што я, уласна, і зрабіў», — напісаў Азаронак.
Паліць грашыма печку ён, праўда, не стаў, абмежаваўшыся банкнотай найменшага наміналу.
Сваю акцыю Азаронак прысвяціў памяці Уладзіміра Жырыноўскага: ён спальвае купюру пад словы расейскага палітыка пра тое, што «даляр — гэта брудная зялёная паперка».
Нагадаем, што рост курсу даляра ў Беларусі апошнім часам паскорыўся, на нядаўніх таргах ён дасягнуў 3,533 беларускага рубля. Некаторыя банкі прадаюць даляры ўжо па 3,69 і нават 3,7 рубля. Адначасова падае і расійскі рубель, які апынуўся ў самым ніжнім пункце з пачатку поўнамаштабнай вайны і працягвае падзенне.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары