У Асіповічах падчас вячэры ў дзіцячым садку памерла двухгадовае дзіця
У дзіцячым садку Асіповічаў памерла двухгадовае дзіця, але ўлады пра гэта не паведамлялі. Цяпер Следчы камітэт праводзіць праверку надзвычайнага здарэння, а выданню «Люстэрка» ўдалося даведацца падрабязнасці трагедыі.
Як стала вядома «Люстэрку», надзвычайнае здарэнне адбылося ў Асіповіцкім дзіцячым садку № 12. Са слоў крыніцы, знаёмай з сітуацыяй, усё здарылася ў канцы снежня мінулага года.
Дзіця знаходзілася ў групе, падчас вячэры адбылася асфіксія — стан, пры якім звужаюцца дыхальныя шляхі з-за трапляння іншароднага аб'екта, а арганізм не атрымлівае кісларод.
«Ён еў блінец і не змог яго пражаваць», — расказаў суразмоўца. Паводле яго слоў, сям'і не дазваляюць гаварыць пра трагедыю публічна.
Журналістка «Люстэрка» патэлефанавала ў аддзел па адукацыі Асіповіцкага райвыканкама як занепакоеная жыхарка горада. У ведамстве пацвердзілі інфармацыю пра гібель дзіцяці і паведамілі, што СК праводзіць следчыя дзеянні.
«Тая інфармацыя, якая павінна быць даведзеная да грамадскасці, будзе даведзеная ва ўстаноўленым парадку. Для мяне гэта трагічны выпадак, — адказала чыноўніца. — Аддзел адукацыі ў той жа дзень знаходзіўся на месцы, усе службы былі праінфармаваныя неадкладна. Гэта пракуратура Асіповіцкага раёна, Следчы камітэт раёна, райвыканкам і вышэйстаячая арганізацыя — Упраўленне па адукацыі [Магілёўскага аблвыканкама]».
Па словах супрацоўніцы аддзела па адукацыі, выхавальнікі, якія ў той дзень былі на змене, як і загадчыца дзіцячага садка, працягваюць знаходзіцца на працоўных месцах. На час правядзення праверкі праз надзвычайнае здарэнне іх не адхілялі.
«На якой падставе яны могуць сёння не працаваць? Вы ж нічога не ведаеце пра тое, што адбылося, — заявіла яна. — Гэтая ўстанова працуе дзесяцігоддзямі тым складам, што і сёння, уключаючы тых жа выхавальнікаў. Праз іх рукі прайшлі сотні дзяцей. Там і сёння 110 дзяцей. Усе жывыя і здаровыя.
Я дзесяцігоддзямі працую ў сістэме адукацыі, і гэта першы такі выпадак, трагічны выпадак. Цяпер вызначаецца, хто ў ім вінаваты і ці вінаваты. Калі вызначаць, што ёсць віна супрацоўнікаў, то, вядома, яны панясуць пакаранне. У цяперашні момант мы лічым, што іх віны няма».
Як адзначыла чыноўніца, супрацоўнікі аддзела адукацыі таксама прысутнічалі на пахаванні загінулага дзіцяці.
Цяпер чытаюць
«Для беларускіх уладаў я, хутчэй, магчымасць, а не пагроза». Калеснікава дала вялікае інтэрв’ю Золатавай73
Каментары