Расійская прапагандыстка Андрэева свабодна падарожнічае па свеце з пашпартамі Чарнагорыі і Гандураса ў кішэні
Вядучая-прапагандыстка расійскага «Першага канала» Кацярына Андрэева свабодна падарожнічае па Еўропе дзякуючы таму, што мае, акрамя расійскага, таксама грамадзянствы Чарнагорыі, якое атрымала ў 2011 годзе «за заслугі», і Гандураса, атрыманае ў 2005 годзе, магчыма, праз мужа, паведамляецца ў новым расследаванні «Каманды Навальнага».
З гэтымі пашпартамі Андрэева можа ўязджаць у краіны ЕС нават пасля пачатку вайны. Напрыклад, 6 ліпеня 2023 года яна выехала з Расіі праз наземную мяжу ў Нарвегію і Фінляндыю, хоць абедзве краіны ўжо не выдавалі візы расіянам.
Пры гэтым у эфірах Андрэева рэгулярна абвінавачвае Захад у русафобіі. Напрыклад, 6 жніўня 2022 года яна скардзілася на пагрозы рускім у Еўропе, а ўжо на наступны дзень паехала ў Фінляндыю. Праз тыдзень пасля вяртання яна заявіла пра «еўрапейскі крызіс з-за санкцый».
«Гэта ненармальна, калі ўжо тры з лішнім гады ідзе вайна, а адна з галоўных асоб ваеннай прапаганды спакойна падарожнічае па свеце і паводзіць сябе як бесклапотны трэвел-блогер», — абураецца «Каманда Навальнага».
Яна выказвае намер дамагацца, каб Андрэеву ўнеслі ў санкцыйныя спісы і пазбавілі ганаровага грамадзянства Чарнагорыі.
Каментары