Загаварыла адна з дачок Пуціна: Чалавек, які забраў мільёны жыццяў і разбурыў маё
Луіза Розава, меркаваная дачка Уладзіміра Пуціна, да гэтага часу жыла быццам у цені, упершыню адкрыта распавядае пра сваю сям’ю і жыццё ў французскай эміграцыі. Bild сабраў яе найважнейшыя заявы.
Луіза Розава нарадзілася 3 сакавіка 2003 года ў Санкт-Пецярбургу як Лізавета Крываногіх. Яе маці, магчыма, была каханкай Пуціна і пасля нараджэння дзяўчыны нечакана разбагацела. Сама Луіза скончыла мастацкую акадэмію ў Парыжы і ладзіла антываенныя выставы, але ніколі прама не каментавала вайну ва Украіне і магчымае сваяцтва з Пуціным. Таксама вядома, што ў яе сведчанні аб нараджэнні пустая графа «бацька», але ўказана імя па бацьку «Уладзіміраўна».
Апошнія гады Луіза заўсёды сачыла за тым, каб у сацсетках не паказваць поўнасцю свой твар. Цяпер яна ўпершыню выклала адкрытыя сэлфі і напісала ў адным з пастоў:
«Так цудоўна зноў паказаць свету свой твар. Гэта кожны дзень нагадвае мне, кім я нарадзілася і хто разбурыў маё жыццё. Чалавек, які адабраў мільёны жыццяў і разбурыў маё».
Пры гэтым імя Пуціна яна прама не называе.
Да гэтага расійская апазіцыя неаднаразова крытыкавала Розаву за публічнае жыццё ў сацсетках з элементамі раскошы: яна публікавала фота ў дызайнерскай вопратцы, лётала на прыватных самалётах, працавала дыджэем у модных клубах.
Пасля лютага 2022 года, па яе словах, яна пакінула Расію, разарвала ўсе сацыяльныя сувязі і цяпер жыве ў «залатой клетцы»: «Я не магу прайсціся па любімым Пецярбургу. Не магу пабываць у любімых месцах і ўстановах»
Аб праблемах украінскіх і расійскіх сем’яў у гэтай вайне яна пры гэтым не сказала ні слова. Але і за межамі Расіі ёй працягвалі нагадваць пра мінулае: так, у чэрвені расійская мастачка ў эміграцыі Насця Радзівонава адмовілася ад супрацоўніцтва з парыжскімі галерэямі, у якіх антываеннае мастацтва курыравала Розава — менавіта тая, хто нібыта нажылася на расійскім рэжыме.
Цяпер Луіза ўпершыню адрэагавала на гэта прамымі словамі:
«Я сапраўды вінаватая ў дзеяннях сваёй сям’і, якая мяне нават не чуе?»
У чэрвені Bild пагутарыў са студэнтамі акадэміі ICART, якую Розава паспяхова скончыла, а таксама з мастакамі, якія ведалі яе па працы ў галерэях. Думка ўсіх пра яе была хутчэй станоўчая: «Вельмі мілая дзяўчына. Ці вінавата яна ў тым, хто яе бацькі?»
Цяпер, у парыжскай эміграцыі, Луіза Розава імкнецца змяніць свой імідж. У Instagram яна асуджае вайну ва Украіне і крытыкуе культ брэндаў, які характэрны дзецям эліты: «Льняная кашуля без лагатыпа можа перадаць больш праўды, чым дызайнерская шоўкавая сукенка».
Каментары