«У плане былі яшчэ некалькі краін». Маршрут Лукашэнкі складалі так, каб не надта біла па здароўі
Кіраўнік МЗС Максім Рыжанкоў расказаў, як планавалася доўгае турнэ Лукашэнкі. І назваў яго «жалезным чалавекам».
Аляксандр Лукашэнка сёння вярнуўся з зацяжнога турнэ. Ён наведаў Кыргызстан, М'янму, Алжыр і двойчы Аман. Пры гэтым перамовы ў апошняй краіне выглядалі дзіўна і напаўсакрэтна.
Рыжанкоў расказаў СТБ, што такі маршрут скласці было складана. У тым ліку з палітычных прычын.
«З чаго пачынаць? Як сумясціць краіны? Гэта вельмі складанае пытанне. Пытанне вельмі складанае і для пратакола (пратакольнай часткі), і ў палітычным плане. Вы абсалютна маеце рацыю, калі казалі, што для некаторых краін мае значэнне, калі ты прыязджаеш у рэгіён — куды паедзеш першым.
Некаторыя прэтэндуюць, каб ехалі толькі да іх. Іншыя краіны, у якіх, можа быць, дачыненні не вельмі добрыя паміж сабой з тымі краінамі, куды мы едзем, таксама не вельмі хацелі б, каб мы прыляталі да іх з непрыязнай краіны альбо адляталі ад іх у непрыязную краіну», — адзначыў Рыжанкоў.
Але яшчэ адзін важны момант — гэта здароўе 71‑гадовага палітыка. МЗС цяпер вымушаны адштурхоўвацца і ад гэтага пытання. Рыжанкоў з гэтай нагоды параўнаў Лукашэнку з героем сусвету Marvel Жалезным чалавекам.
«Мы ж разумеем, што наш прэзідэнт хоць і жалезны, але ён усё роўна чалавек. Таму нам трэба выканаць яшчэ мінімальныя рэчы, звязаныя з нейкім невялікім адпачынкам для яго, каб часавыя паясы не былі занадта драматычныя для здароўя. Каб была магчымасць падрыхтавацца да кожнай сустрэчы, каб не было вялікай розніцы ў кліматычных нейкіх рэчах», — падзяліўся Рыжанкоў.
Кіраўнік МЗС дадаў, што ў турнэ планаваліся яшчэ некалькі краін. Называць ён іх не стаў, але адзначыў, што іх перанеслі на першы квартал наступнага года.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам12
Каментары