Паездка ў Канаду прадстаўнікоў дэмакратычных сіл Беларусі праходзіла 7—9 чэрвеня.
Для Аб’яднанай грамадзянскай партыі Канада, магчыма, нават большы прыярытэт, чым Еўропа і ЗША. Пра гэта заявіў лідэр партыі Анатоль Лябедзька, каментуючы 14 чэрвеня на прэс‑канферэнцыі ў Мінску вынікі візіту дэмакратычных палітыкаў у гэтую краіну.
Паездка ў Канаду прадстаўнікоў дэмакратычных сіл Беларусі праходзіла 7—9 чэрвеня. У склад дэлегацыі ўвайшлі Лябедзька, намеснік старшыні АГП Яраслаў Раманчук, міжнародны сакратар АГП Андрэй Дзмітрыеў і лідэр грамадзянскай кампаніі «Гавары праўду!» паэт Уладзімір Някляеў.
«Мы ў Еўрасаюзе шмат часу трацім на нейкія перамовы і дамоўленасці. У Канадзе дамаўляцца можна хутка», — сказаў Лябедзька.
Раманчук адзначыў, што «Еўропа і ЗША думаюць, што ім рабіць з Беларуссю. У Канадзе ўжо вызначыліся па гэтым пытанні».
Паводле яго слоў, Канада ўжо дакладна вызначылася ў сваіх прыярытэтах пры супрацоўніцтве з Беларуссю. «Інвестыцыі з Канады магчымыя толькі пасля дэмакратычных рэформ, устанаўлення рэальнай свабоды сродкаў масавай інфармацыі, плюралізму меркаванняў», — сказаў Раманчук.
Палітык дадаў, што паездка апазіцыйных палітыкаў у Канаду паказала дыпламатычны правал беларускіх улад на канадскім напрамку.
Паводле слоў Някляева, «уся беларуская дыпламатыя прайшла па калідорах улады Канады значна менш, чым мы за адну паездку».
»У выпадку прыходу да ўлады дэмакратычных сіл Канада гатовая стаць лакаматывам інтэграцыі Беларусі ў сусветную эканоміку», — працытаваў Някляеў словы прэм’ер‑міністра Канады Сцівена Харпера. Лябедзька таксама паведаміў, што дэмакратычныя палітыкі плануюць ажыццявіць «сур’ёзную паездку ў Берлін». «Нам важна знайсці аднаго моцнага саюзніка ў Еўропе. Хацелі б знайсці такую падтрымку ў Берліне ці Лондане», — сказаў ён.
Цяпер чытаюць
Чаму YouTube выдаліў каналы БелТА, СТБ і АНТ? Вось што вядома11
Каментары