Яму надзелі кайданкі, сканфіскавана ўся тэхніка.
Затрыманы былы афіцэр міліцыі, які вечарам 19 снежня ў час акцыі пратэсту апазіцыі ўгаворваў спецназаўцаў не ўжываць сілу супраць дэманстрантаў.
Позна ўвечары 20 снежня ў сваёй кватэры на праспекце Ракасоўскага ў Мінску быў затрыманы былы афіцэр міліцыі Аляксандр Класкоўскі. Відэакадры, на якіх ён у кіцелі лейтэнанта міліцыі і са скрываўленай галавой угаворвае супрацоўнікаў міліцэйскага спецназа не ўжываць сілу супраць дэманстрантаў, абляцелі інтэрнэт. На іх Аляксандр кажа, звяртаючыся да міліцыянтаў: «Вы што, ідыёты?.. Стукні лейтэнанта! Я шэсць гадоў да яго ішоў, я войска прайшоў. Бі! Ну, сур'ёзна, - я цябе біць не буду, бі мяне!»
Кватэру А. Класкоўскага ўзялі штурмам трое супрацоўнікаў КДБ у цывільным. Яны канфіскавалі кампутар, фотаапараты, флэш-карты, а самога Класкоўскага павезлі ў невядомым кірунку.
Аляксандр Класкоўскі праходзіў службу ў органах унутраных справаў з сакавіка 1999 года па сакавік 2005 года.Па заяве МУС, «зарэкамендаваў сябе з адмоўнага боку як недысцыплінаваны супрацоўнік. Неаднаразова дапускаў парушэнні службовай дысцыпліны, за што прыцягваўся да адказнасці». Звольнены з МУС за кіраванне аўтамабілем у нецвярозым стане.
Аляксандр - сын вядомага беларускага журналіста, супрацоўніка інфармацыйнай кампаніі БелаПАН Аляксандра Класкоўскага.
Як расказала сястра затрыманага Вольга Класкоўская, яе брата моцна збілі падчас затрымання: «Білі па твары і нырках, лаяліся, казалі, што пакажуць яму ў «амерыканцы» такое жыццё, што мала не будзе. Абвінавацілі ў тым, што ён нібыта плюнуў у твар спецназаўца. Я гаварыла з жонкай Наталляй, яна ў шоку. Добра, што дома ў той момант не было дзяцей».
Па словах Вольгі, паколькі ў кватэру Аляксандра ламіліся невядомыя, была выкліканая міліцыя.
Тыя, што ўварваліся ў кватэру, паказалі прыбылым міліцыянтам пасведчанні супрацоўнікаў КДБ, адно з іх было на прозвішча Лагун, і запатрабавалі скласці пратакол за «ілжывы выклік».«Пазней я патэлефанавала ў КДБ, каб даведацца пра лёс брата, але мне адмовіліся даць інфармацыю, прапанаваўшы прыйсці на прыём», - сказала сястра затрыманага і дадала, што мае намер звярнуцца ў праваабарончыя арганізацыі. Яна збіраецца таксама арганізоўваць акцыі пратэсту каля беларускай амбасады ў Стакгольме, дзе жыве цяпер. «Калі не стварыць грамадскі рэзананс, чалавека могуць папросту ўгробіць», - лічыць Вольга Класкоўская.
Як паведаміла БелаПАН жонка затрыманага Наталля, цяпер Аляксандр Класкоўскі знаходзіцца ў Галоўным упраўленні папярэдняга расследавання ГУУС Мінгарвыканкама.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку22
Каментары