Жанна Літвіна наведала АГіМ Савецкага раёна, а ГА «БАЖ» накіравала афіцыйныя звароты кіраўнікам Генеральнай пракуратуры РБ, Дэпартамента па грамадзянстве і міграцыі МУС РБ, а таксама Дзяржаўнага памежнага камітэту РБ.
Да ўсіх лістоў прыкладаецца тэкст заявы БАЖ ад 15 сакавіка з нагоды абмежавання выезду за межы РБ шэрагу сябраў арганізацыі.
Начальніка Дэпартамента па грамадзянстве і міграцыі МУС Аляксея Бегуна і старшыню Дзяржаўнага памежнага камітэта Ігара Рачкоўскага ГА «БАЖ» просіць «паведаміць, якая дзяржаўная ўстанова і на якой падставе прымала рашэнне абмежаваць выезд з краіны сябрам ГА “БАЖ”», а таксама «прыняць усе неабходныя меры для аднаўлення іх правоў і недапушчэння парушэння канстытуцыйнага права грамадзян Беларусі на выезд у будучым».
Генпракурора Аляксандра Канюка журналісцкая арганізацыя заклікае не толькі аднавіць правы нявыязных, але і «вынесці прадпісанні кампетэнтным дзяржаўным органам і іншым арганізацыям аб неадкладным ліквідаванні парушэнняў заканадаўства, прычын і ўмоваў, што спрыяюць гэтым парушэнням», а таксама «папярэдзіць службовых асоб аб недапушчальнасці паўторнага здзяйснення альбо падрыхтоўкі да здзяйснення імі супрацьпраўных дзеянняў».
Сёння старшыня ГА «БАЖ» наведала АгіМ (Аддзел па грамадзянству і міграцыі) Савецкага раёна Мінска. Адказу на галоўнае пытанне — кім прынята рашэнне пра абмежаванне выезду Ж. Літвіной і на якой падставе — яна так і не атрымала. Затое ёй была выдадзеная на рукі «Даведка (выпіска) з банка дадзеных аб грамадзянах РБ, права якіх на выезд з РБ часова абмежаваны».
З дакумента вынікае, што звесткі, якія сталі падставай для абмежавання яе выезду, падало Міністэрства юстыцыі РБ 5 сакавіка.
«Такія звесткі могуць быць пададзеныя Міністэрствам юстыцыі толькі ў тым выпадку, калі судом узбуджана справа аб банкруцтве альбо эканамічнай няздатнасці юрыдычнай асобы, — пракаментаваў змест “выпіскі” намеснік старшыні ГА “БАЖ” Андрэй Бастунец. — Але гэта нонсэнс — каб сам даўжнік не ведаў пра пачатак такога працэсу. Таму накіраванне звестак Мінюстам, мякка кажучы, памылковае. Натуральна, гэта будзе абскарджвацца».
Нагадаем, што пачынаючы з 11 сакавіка ўжо 5-і сябрам ГА «БАЖ» — старшыні арганізацыі Жанне Літвіной, а таксама Валянціну Стэфановічу, Андрэю Дынько, Міхасю Янчуку і Гары Паганяйлу – не дазволілі выехаць за межы Беларусі на невядомых падставах. Даведка, якую выдалі на рукі Гары Паганяйлу, па змесце аналагічная той, што атрымала сёння Жанна Літвіна.
Каментары